"Asteburuan Enkarguk zerbitzuaren bizikleteta lapurtu digute". Horrela eman dute asteburuan izandako lapurretaren berri Enkarguk zerbitzuaren arduradunek, gaur eguerdian, sare sozialen bidez. Enkargukekoek bi bizikleta erabiltzen dituzte etxez etxeko banaketa zerbitzua eskaintzeko, eta bi horietatik txikiena lapurtu diete. "Besteari, berriz, bateria kendu diote", salatu dute. Era berean, zerbitzuaren arduradunek zehaztu dute Azoka Plazako eraikinaren barruan zegoela bizikleta gordeta, eta handik eraman dutela.
Norbaitek informazio gehiago izanez gero, Udaltzaingora jotzeko, bulegora bertaratzeko edo 943-15 13 13 telefonora deitzeko eskatu dute Enkargukeko langileek.
Uneotan bizikletarik gabe egon arren, ez dute zerbitzua eten, eta jakinarazi dute auto bidez egingo dituztela banaketak.