Zokomiran

Urte berria

Joxin Iturriotz

Hasi da urte berria. Asmo zaharrak berritzeko garaia omen. Eta, lehengoez gain, geure buruari asmo berriak ezartzekoa. Aurreko urtekoak beteta geratu balira bezala. Neuk ere baditut neureak.

Egin gabe geratu direnak eta berri-berriak.

Ariketa gehiago egin behar dut. Oinez eta bizikletaz astean gutxienez hiru-lau aldiz ibili.

Etxeko trasteroa trastez pilatzen joan da urtean zehar eta ea, behingoz, zertxobait txukuntzen dudan.

Irakurketa ere hor da. Apaletan liburu ugari dut noiz hartuko. Hautsak jan baino lehen.

Eta, kapritxo bat aipatzearren, musika ikastea aipatuko nuke. Maila apal-apalean. Belarriek elkarren aurka hainbeste borroka egin ez dezaten, besterik gabe.

Eta etxeko gela hori pintatu eta berritu. Eta lagunekin gehiagotan egon. Eta... Baita hori ere! Eta ahaztuta neuzkanak.

Asmo ederrak guztiak. Baina asmotik gero eta gutxiago daukatenak.

Ariketa egitea gero eta beharrezkoagoa dugu, gaitzak har ez gaitzan. Trasteak, gero eta gutxiago, gehienak alferrik baitira. Musikarako beranduegi ez ote da?

Bizitzaren erdia pasatuta daukagunok, egin dezakegunari baino gehiago gelditzen zaigunari begira jarrita gaude. Asmoak, egin nahiko genukeena gero eta gutxiago, eta egin beharrekoari ahal den neurrian eutsi.

Urtebete pasatu da, eta zahartzen ari gara.