San Sebastianak

Jon Galdos:"Zuzendari probatzeko gogoa daukat"

Enekoitz Esnaola

Jon, Luis aitarekin, Arauntzan, 1975ean, zazpi urte zituela

• Ez duzu lehen aldia nagusietan zuzendari bezala, ezta?

  Ez, txikia nintzela aitaren ondoan irteten nuelako Arauntza taldean; zuzendaria zen gure aita. Hiru bat urtean irten nuen. Baina hura beste kontu bat zen; nik, ondoan egotearekin nahikoa nuen, aurreneko aldian zazpi urte besterik ez nituelako.

• Gero, nagusien danborradan beti danborra jotzen.

  Barratsun. Baina badut gauza berri hau probatzeko gogoa.

• Zer dela-eta zuzendari?

  Bromatan hasi ginen soziedadean, eta neuri esaten zidaten zuzendari izateko, lehen ere izana nintzelako. Eta broma zena gauza serioan bihurtu da.

• Serioan?

  Beno, esateko modu bat da. Baina bai sortzen didala ardura bat, taldean beterano asko dauden arren, taldea bera azken batean berria delako.

• Piezak entzun eta entzun jardungo duzu?

  Bai horixe! Barratsun beti larruarekin eta orain Oilo-Soron txaparekin; badago aldea, batzuetan une desberdinetan jotzen delako. Beraz, txipa aldatu eta saiatzen ari naiz ondo ikasten. Taldeak, besteekin entsegu orokorrak egiteaz gain, beste bi entsegu ere egingo ditu.