Hauteskundeak : Manuel Unanue: "Egoeragatik goaz EAJrekin batera, eta ez horrenbeste alkategaiagatik"

Julian Eizmendi: “Habea gabe, emaitzek ez dute herria islatuko, baina zilegitasuna edukiko dugu"

[Elkarrizketa biei batera egin genien, aldizkarian aparte jarri baditugu ere. Hemen, baina, dena segidan jarriko dugu] Programako ardatzak zehazteko bilerak, aurkezpena, elkarrizketa, argazki ofizialak... Horietako gauza asko ez ditu berriak Julian Eizmendik, lehen ere aurkeztuta dagoelako —EEtik— baina erantzukizuna du bestelakoa: orain alkate izateko aukera handia du. Eta hori, desberdina da. “Hau dena berria da niretzat”, dio. Manuel Unanue ez dago bere territorioan, batzokian dagoelako elkarrizketaren unean, baina etxean bezala mintzo da EAko Azpeitiko lehendakaria. Badirudi edozein tokitan mintzo dela beti berdin. Irekia baita. Urteak daramatza politikan, baina ez darabilki politikarien erretorika.

-Animatuta alkate kargu posible baterako?

Julian Eizmendi: Animatuta, eta ilusionatuta.

-Zer dela eta? Noiz aipatu zizuen aurkezteko? Orain dela aspaldi?

Eizmendi: Joan den urteko urri bukaera aldera. Batzorde bat zegoen hori kudeatzeko, herri batzordetik zegoen talde bat, eta nire izena aurkeztu zuten.

-Zeu ordurako afiliatuta al zeunden?

Eizmendi: Ez, ni gero afiliatu nintzen. Baina ni azken urteotan ildo honetan nengoen, eta espreski adierazi izan dut, batik bat su-etena apurtu zenetik aurrera aktiboki koalizioaren inguruan aritu naizelako. Baina nik beti eduki diot halako erreparoa afiliatzeari, batik bat Diputazioan betetzen dudan karguagatik. Udal harremanetarako unitate teknikoko burua naiz eta orduan, zenbait udaletxeko gaiak kudeatzen ditugu, udal arazoetan sartzen gara eta askotan epaile lana egin behar izaten dugu. Orduan, hor objetibotasuna balore garrantzitsua da. Ni neure lanean objetiboa eta profesionala kontsideratzen naiz. Baina etiketa baduzu, sartzen zara arazoa konpontzera eta… Hori beti garbi izan dut. Eta hautagai izatea onartu nuenean, eta zerrendaburu izendatu nindutenean erabaki nuen afiliatzea, nolabait neure konpromisoa indartzeko.

-Zure hautagaitza ustekabez hartu al zenuen?

Eizmendi: Egia esan, ezustea hartu nuen proposatu zidatenean. Bueltak eman nizkion, denbora bat hartu nuen pentsatzeko. Eta gogoetaren ondoren erabakia hartu behar nuela eta onartu egin nuen proposamena.

-Azkeneko hilabeteetan buru-belarri ibiliko zara...

Eizmendi: Lantokian hartu ditut opor batzuk lan hauetarako, lantokian ere segitu dut, ordu asko ari naiz sartzen, programarekin eta.

-Lehen ere aurkeztu izan zara hauteskunde zerrendatan bi aldiz...

Bai.

-Euzkadiko Ezkerran. Aldaketa hori nolatan? Bi alderdi desberdin dira…

Eizmendi: Desberdinak ziren. Gaur egun bat desagertuta dago, ez dago: EE.

-PSErekin bat eginda dago.

Eizmendi: Gehiengo batek siglak eraman zituen. Ni orduan zergatik nengoen EEn? Beti izan dut bokazio politikoa, txiki-txikitatik. Akordatzen naiz oraindik, irudiak ditut buruan: 8-9 bat urte nituela gure etxean Radio Paris entzuten zen, irratia harrapatzeko izugarrizko arazoak zeuden, hemen Francoren garaia zen eta informazioa beste era batera izateko harrapatzen genuen irrati hori. Mutil kozkorra nintzenean gure etxean kezka hori bazegoen.

Oroimen gehiago ere badauzkat. 10-14 urte nituen bitartean, ikastera Institutura joan behar izaten genuen. Burgosko prozesuan nik hamabi urte nituen, eta etxetik hara bidean eskaparate bat eta liburutegi bat zeuden eta prozesuaren jarraipena egiten nuen eskaparatean agertzen ziren lehen planokoak jarraituz.

Gero, unibertsitaria nintzela, Euskadiko Ezkerra sortu zen eta afiliatu egin nintzen. Eta gero likidazioko prozesuan ere egon nintzen. 1992. urtean uste dut. Nire ondorioa hau izan zen: EE ezker ortodoxoa politikagintzan sartzeko borondatearekin sortu zen. Azken batzarrean 600 bat batzarkide ginen eta 40 botogatik-edo irabazi zuten. Alde bat PSEra joan zen eta beste batzuk azkenerako EA eta EAJ aldera.

-Ezker ikuspegitik, nola kontsideratzen duzu EAJ.

Eizmendi: Nik uste EAJ politika sozial aurrerakoia egiten ari dela Eusko Gobernuan eta. Nik dauzkadan printzipioak ere hor daude, akzio publikoak berdintasun eta elkartasun irizpideetan oinarritutakoa izan behar duela uste dut, eta horretarako gaude EAJn, hori gauzatzeko.

-Bere garaian EAJrekin kritikoa izango zinen politika sozialean eta.

Eizmendi: Bere garaian EE kritikoa zen EAJrekiko arlo horietan. Orduan geuk geure programak geneuzkan eta PNVk zeuzkan bereak. Nik uste dut orain, lehen esan bezala, PNV politika sozial aurrerakoia egiten ari dela, eta nire printzipioak ere hor ikusten ditut. Guri tokatzen zaigun erronka horretan ere saiatu gara arlo horiekin koherenteak izaten.

-Beraz, ez duzu kontsideratzen PNV eskubiko alderdia…

Eizmendi: Eskubia eta ezkerra kontzeptuak ez dira gaur egun nire unibertsitate garaikoak bezala. Lehengo ezkerra eta eskubikoa kontzeptuak pixka bat difuminatu egin dira. Kontua da gobernatzeko erantzukizunak hartzen ditugunean, politika aurrerakoia edo programa aurrerakoia aurrera eramateko azaltzea eta gero hori gauzatzea, eta nik uste dut PNVk hori egiten duela.

Manuel Unanue: Ezkerra-eskubia kontzeptua azkenean oso zaila gelditzen da. Hamar pezeta baldin badituzu, azken finean hori nola erabiltzen den da kontua. Azkenean ezkerra edo eskubia, azpeitiarrek erabakiko dutena da azkenean guk gastatzen dugun hori zertan gastatzen dugun, eta horrek definituko du ezkerra edo eskubia. Udal hauteskundeetan, kontua da zer eskaintzen duzun, zein pertsonekin eta zer duintasunekin aurkezten zaren leku batera eta transparentzi hori nola dagoen. Alderdi bat ez da zerbait monolitikoa. Bakoitzak bere alderdi barruan aportatzen du aportatzen duena eta, orduan, nik uste dut, ez dakit zeini esker, gauza monolitikorik ez dagoela.

Eizmendi: Nik irizpideak betikoak ditut: sozialak. Ezkerraren eta eskubiaren kontzeptuak aldatu egin dira eta nik garbi daukana da, EAJk politika soziala aurrerakoia egiten duela, eta zehazki, eta guri dagokigunez, koalizioan egin dugun programa aurrerakoia dela.

-Udal barruko funtzionamendua nolakoa den ezagutzeko, xehetasun gehiagorekin ezagutzeko lanik egin al duzu azkenaldi honetan? Gaur egun Azpeitiko Udalean dagoen jendearekin egon al zara?

Eizmendi: Zinegotziekin programa taxutzeko behin baino gehiagotan bildu naiz, noski. Bilera dezente eduki ditut. Udaletako kontuak eraman ditut azkeneko zazpi urteetan, Gipuzkoako Foru Aldundiko Udal Kudeaketa Unitate Teknikoko Burua naizelako. Beraz, lanbideagatik ezagutzen dut udalen funtzionamendua.

-Teknikoki, izan daiteke. Bestela, alkate batek izan behar duen talanteari dagokionez eta, zer eskaintzeko, zer egiteko asmoa daukazu?

Eizmendi: Talante ireki eta dialogante batekin egingo diegu aurre gauzei, eta hori taldeak argi du.

-Ateak zabalik herritar guztiak…

Eizmendi: Herri osoari zerbitzeko gaude.

-Denak hori esaten dute, baina gero bete…

Eizmendi: Saiatuko gara betetzen.

Unanue: Dudarik ez hori herri guztietan esaten dela, eta gero galdetu bati edo besteari eta esango dizu bete den edo ez. Gure eginbeharra da udaletxera datorrenari entzutea, eta, hala, ateak zabalik edukiko ditugu, eta ahal bada, denon artean adostuko ditugu gauzak. Baina guk ere lehentasun batzuk markatuko ditugu, eta erabakiak Udalean daudenek hartzen dituzte.

-Ateak zabalik. Durangon alkateak bai (EAJkoak): herritarrek telefono linea zuzena zuten harekin. Zer iruditzen?

Eizmendi: Irekia izan behar du, baina ordu guztietan zuzeneko linea izatea... Ez dakit egokia den efikazioa aldetik. Igual onena ordu batzuetan bakarrik jartzea litzateke.

Unanue: Jendeari erraztasunak eman behar zaizkio. Jendea udaletxera joaten denean, ez dadila ibili galduta. Gauza horiek pentsatuta ditugu. Zehaztuko dugu nola izan behar duen.

-Jose Mari Bastidaren lan estiloa nahikoa pertsonala zen. Zurea nolakoa litzateke?

Eizmendi: Ekipoan lana egiteko asmoa dago, hori garbi. Udala hiru areatan banatuko dugu: bat ekonomiarekin zerikusia duena (hirigintza, ingurumena, industria, merkataritza, nekazaritza eta turismoa), beste zerbitzu orokorrak (ogasuna, barne antolakuntza, giza baliabideak, gizarte zerbitzuak), eta hirugarrena gazteria, kultura, hezkuntza, euskara, kirola, festak…. Hiru-lau zinegotzik area bana hartuko lukete eta nik koordinatu egin beharko nituzke. Baina ekipoan lan eginda.

-Zeu ikusten al zara hemezortzi urtean alkate, Bastida bezala?

Eizmendi: Herriak konfiantza hori eman izan dio, eta bera indartsu izan da. Baina ezohiko kasua da horrenbeste urtean alkate egotea. Nik uste logikoena zortzi urtean egotea dela.

-Nolako lana egin du Bastidak?

Eizmendi: Puntako herria utzi du, bizi kalitate handikoa. Hortaz, erronka handia dut. Erronka handia dut. Herriko historiara pasatuko den alkatea da Jose Mari.

-Hautagai izango zarela emandako aurkezpenean behin eta berriro aipatu zenuen bizi kalitatea. Zer da hori?

Eizmendi: Uste dut estatistikoki 60 bat parametro erabiltzen dituztela bizi kalitatea neurtzeko: etxebizitzak lortzeko ahalmena, teknologia berriak, aberastasuna, renta per capita, elektrogailuak, autoak, aberastasuna neurtzen duten parametroak, erosteko ahalmena, aisialdia, ikasketa maila, hezkuntza maila, ingurumena… Denak kontuan hartu eta horrek adierazten du azpeitiarrok dugun bizi kalitatea handia dela.

-Etxebizitza, aipatu duzu. Eta arazo latzak daude herrian. Beraz, bizi kalitatea…

Eizmendi: Etxebizitzena da gure programako puntu nagusia. Programa egiteko garaian buelta gehien eman diogun kontua izan da. Azken batean, prezio tasatuetan, babes ofizialetan edo sozialetan 200 etxebizitza egiteko helburua daukagu jarrita herri babespeko politikaren bitartez.

Unanue: Erabaki duguna da azkenean kopuru batera konprometitu behar ginela. Horrek asko esan nahi du esan, horrek lotu egiten gaituelako, baina herriko babespeko gutxienez 200 etxebizitza egiteko konpromisoa hartu dugu.

-200 etxebizitza horiek zer lirateke, etxebizitza berriak, lur berrietan edo gaur egun hutsik dauden eraikinetan?

Eizmendi: Azpeitian nolabaiteko lur eskasia dago. Herri babespekoak egingo ditugu egun erresidentzialak diren tokietan, hutsuneak dauden tokiak aprobetxatu behar ditugu. Baita ere, noski, lurzoru berriak ere eskainiko beharko dira. Orain tokatzen zaigu, gainera, arau ordezkatzaileak begiratzea. Hamar bat urteko perspektiba izan beharko dugu.

-Hutsik dauden etxebizitzei buruz, zer?

Eizmendi: Hutsik dauden etxebizitza kopurua handia da Azpeitian, %22koa edo. Politika egokia izan daiteke hutsik dauden etxebizitzak prezio sozialean alokairuko bezala eskaintzea.

Unanue: Etxebizitza hutsen problematika da, etxebizitza hutsen jabe horrek etxebizitza horrekin zer egitea nahi duen; horretarako askatsun osoa dauka. Baina guk erraztasunak jarri behar dizkiogu hutsik duen etxebizitza hori hutsik eduki beharrean alokairuan jartzeko.

Eizmendi: Eusko Jaurlaritzak Etxebide programa nahiko aurreratuta dauka. Hau da, pentsa jabeak etxea alokairuan ateratzen duela, 60.000 pezetan edo, Jaurlaritzak jabeari diru hori emango dio, baina alokairuaren onuradunari merkeago. Azpeitiak hori aurrera eramatea erabakiko balu, etxebizitza hutsen poltsa egin beharko litzateke gero alokairuan ateratzeko.

-Hori Azpeitian zerbait berria litzateke.

Eizmendi: Arazo hori ez da gure herrikoa bakarrik.

-Etxeak egin eta egin ari dira herrian. Eta aparkalekuak? Gabezia handia dago.

Eizmendi: Batetik, Azpeitian autoaren kultoa dago, eta mugikortasun jasangarritasunaren printzipioari helduta, saiatuko gara herrian bidegorriak sustatzen, gune industrialetara garraioa bultzatzen... Bestetik, aparkalekuen kontuari ere buelta asko eman dizkiogu, eta alde zaharra, Betharramistak… aztertuko ditugu lurpekoren bat egiteko zein den egokiena ikusteko.

Unanue: Alde zaharrak bizia izango luke inguruan lurpeko aparkalekua izanda.

-Saihesbidea ahal den azkarren nahiko zenuke.

Eizmendi: Bai. Baita N-1era errazago iristeko neurriak ere (Tolosatik, Mandubitik, Zumarragatik...). Baina hauek ez dira Udalaren konpententziak, baina guk estrategikoki bultzatu egingo ditugu.

-PNV eta EAk Udalbiltzako kide dira. Baina herriko zinegotziek ez dute askorik parte hartu.

Eizmendi: Udalbiltzarena idea ona izan zen. Su-eten garaian sortu zen. Orain bitan banatuta dago. Guk goikoen aginduak beteko ditugu.

Unanue: Baina goikoei ere guk gure ideiak esango dizkiegu.

-Baina Udalbiltza udalek osatutako erakundea da eta ez alderdiek osatutakoa.

Eizmendi: Bai, baina aginduak politikoak dira.

Unanue: Azpeitia mailara gehiago gaude gu zentratuta.

-Azpeitia ere ez al da Euskal Herria da?

Eizmendi: Noski. Baina gu ez gara hasiko teorizatzen; ez zaigu tokatzen, gainera. Goikoek esango digute zer politika jarraitu behar den.

-1999an EHk botoen %34 lortu zuen Azpeitian. Orain herriko ezkerreko platatorma abertzalea —Habeak— legez kanpo utzi dute. Nola ikusten duzu hori?

Eizmendi: EAJ eta EA Alderdi Legearen aurka daude, Batasunaren ilegalizazioaren kontra ere bai, eta Habearen sentsibilitateak eta ikuspegiak udal ordezkaritzan isla izatea nahi dugu.

-PPko eta PSE-EEko ordezkariak mehatxatuta daude eta Eusko Jaurlaritzak (ere) bizkarzainak jartzen dizkie. Ezker abertzaleko ordezkariek eta botoemaileek ere mugatua dute askatasuna, Habearen ilegalizazioa dela eta. Zer egin beharko lukete EAJk eta EAk horren aurrean?

Eizmendi: Gu, gure aldetik, koalizioak ahalik eta boto gehien lortzen saiatuko gara, Habea aurkezten bada edo ez. Aurkezten baldin badira ere bai eta ez baldin badira aurkezten ere bai. Guretzat garrantzitsua da boto asko lortzea. Garai erabakigarrian gaude, garai estrategikoan, irailean aurkeztuko duelako Ibarretxek bere plana, ETAk eta PPk eta PSOEk blokeatuta daukaten egoera politikoa desblokeatzeko, horrekiko aterabide bat aurkeztu behar dugu, aurrera jarraitu behar dugu.

-Baina ezker abertzaleak ezin badu legez aurkeztu? Ez al dira bi kontuak ere desberdindu behar?

Eizmendi: Ezin badu aurkeztu, ezingo du aurkeztu, baina ez gure erruz. Guri botoek emango digute zilegitasuna. Gu botoengatik egongo ginateke udal gobernuan. Horregatik saiatuko gara ahal den boto gehien lortzen aurrera egiteko.

-Ez al da hori jokabide partidista? Alderdi batzuek askatasuna mugatua dutela eta, ba al daukate zilegitasunik hauteskunde hauek?

Eizmendi: Zilegitasuna, behin eta berriro diot, botoek emango digute. Eta berriro diot: Habeak ere egon beharko luke hauteskundeetan. PP eta PSE-EErena ere larria da, askatasun defizit handia dutelako, zerrendan irtenez gero bizkarzain batekin ibiliko direlako, eta hori latza da. Baina diot ETAk ez duela baldintzatuko prozesu politikorik...

Unanue: …eta PPk ere ez. Batzuek ezin dute aurkeztu, batzuk hilerrian baitaude eta beste batzuk kartzelan, eta beste batzuek ezin dute aurkeztu beren bikoteak ez diolako aurkezten uzten. Hemen dena ez da zuria eta dena beltza. Guk azpeitiar bezala aurkeztuko gara, Azpeitiko alderdi bezala, eta Habeari aurkezten ez utzita, gure alderdiko zuzendaritzak esango du EAk esan behar duena.

Eizmendi: Ez da gure errua ez badiete aurkezten uzten. Hemen guri urrats batzuk egiteko eskatzen zaigu eta eskatzen digunak igual ez ditu hartzen, gure ustez berari dagozkionak. Guk beti esan duguna da biolentziarekin lehenbailehen bukatu behar dela, eta denbora badela herrigintzarako eta politikagintzarako.

Unanue: Hemen defizita aipatzen da, eta tristea da, baina lau urte hauetan Azpeitiko zinegotzi batzuek kalteak izan dituzte eta hemen batzuk isilik egon dira. Zinegotzi batzuei eskatu zaienean ‘ekintza hori ez ez ezazu onartu edo zerbait esan ezazu’, mutis egin diote. Nire korporazioko lagunekin egindakoarekin, ‘nire ez zait tokatzen eta hori zera da’-eta esanez. Gu saiatu izan gara esaten ez gaudela ados biolentzi denekin. Gu gaizki konponduko bagina demokraziarekin, eskopetak hartu eta Izarraitzera joango ginateke, baina nola kontu hauekin ez dugun sinesten. Guk sinesten dugu sinesten duguna, eta lana egiten dugu sinesten dugun horrekin. Ez gaude hanka bat leku batean eta bestea beste leku batean. Hemen biolentziak era askotakoak daude. Tristea da azpeitiar bat hautagaia delako etxetik irteteko beldurrez egotea eta auto azpian begira ibiltzea. Tristea den bezala etxetik hartu batzuk goizeko lauretan, eraman eta torturatzea.

-Habeak udal ordezkaririk ez badu, demagun PNV-EAk 15 zinegotzi lortzen dituztela, eta PP eta PSOEk bana. Hori al litzateke Azpeitiko argazkia?

Eizmendi: Ez, Habearen ordezkaritza faltako litzatekeelako. Hori garbi dago. Baina guri botoek emango digute zilegitasuna, erantzukizunak hartzeko, Azpeitia aurrera eramateko eta Euskal Herriko egoera larria desblokeatzeko.

-Berriro udaletxera, Manuel?

Manuel Unanue: Bai, hala ematen du. Lehen ere lau urtean udaletxean egonda nago, eta alkatearen ondokoa izandakoa naizelako 1987-1991n. EA udal hauteskundeetara lehen aldiz aurkeztu zenean izan zen. Orain gustura sartuko naiz berriro. Gainera, Julian eta biok aspaldiko ezagunak gara. Soreasukoak gara. Beraz, badugu harreman bat, eta udal kontuez-eta hitz egindakoak gara.

-Orain dela lau urte ez zineten koalizioan joan, orain bai. Zergatik?

Unanue: Orain dela lau urte ere aukera egon zen koalizioan joateko eta Azpeitiko batzarrak erabaki zuen ez joatea. Orduan askatasuna geneukan ez joateko, eta ez ginen joan. Oraingo honetan, egoera politikoa zein den ikusita, EAko batzar nazionalak erabakia hartu zuen koalizioan joateko, eta Azpeitiko EAk hori onartu du.

-Baina herri denetan EA eta EAJ ez doaz koalizioan.

Unanue: Eta herri askotan bai.

-Orain dela lau urte ere herri askotan, gehienetan, koalizioan joan ziren.

Unanue: Baina orain dela lau urteko batzar nazionalaren erabakia eta gaur egungoa ez dira berak.

-Zuek Azpeitiko EAJren zerrendaburuari ere garrantzia eman diozu, ezta?

Unanue: Beno, horri ere bai, beste gauza batzuen artean. Ez da bera zerrendaburu bat izan edo bestea. Baina ez da izan erabakigarria koalizioan joateko. Askoz erabakigarriagoa izan da EAko batzar nazionalaren erabakia eta ez horrenbeste alkategaiaren kontua.

-Hauteskunde ondoren bakoitzak udal talde bana edukiko du.

Unanue: Bai, hori koalizio barruan adostuta dago.

-Eta zer kalkulu egin dituzue zuek EA bezala? Nola adostu duzue zerrendako ordena?

Unanue: Koalizio barruan formula bat aplikatu da eta aplikazio hori herrietara eraman da.

-Zuek hasieran esan zenuten Azpeitian 13. zinegotzia EArena litzatekeela.

Unanue: Gu saiatu gaituk hori lortzen, baina goi mailan koalizioa egin denean ez dugu hori lortu. Eta onartu behar izan dugu goitik etorri den aplikazio hori.

-Jakitun izango zarete 13.aren garrantziaz, ezta? Izan ere, koalizioak 13 zinegotzi lortzen baditu, EAJk gehiengo osoa izango du Udalean.

Unanue: Gure gustuko koalizioa balitz, lehenena gurea litzateke, bigarrena ere bai… Baina koalizio batean ez da zuk nahi duzun dena onartzen.

-EAk beti esaten du bere estiloa duela, bere ideologia, baina Azpeitian gehiengo osoa EAJk balu…

Unanue: Nik uste pertsona serioak garela eta programa egiten dugunean programa bat egiten dugula. Julian Eizmendik esaten duen bezala, hurrengo Udalean areak egongo dira eta horrela egingo dugu lan. Eta nik nahiago koalizioak hamahiru ateratzea baino hamalau ateratzea, eta hori hamalaugarrena EAJkoa dela. Horrek esango luke udal batzordeetan jende gehiago ibiliko ginatekeela.

-Zuen alderdian zerrendak aukeratzerakoan bi ildo egon dira. Zuenak boto bategatik irabazi du. Harrezkero egin al duzue beste ildoko baten bat sartzeko ahaleginik?

Unanue: Alderdi barruan beti egon dira iritzi desberdinak. Prozesu bat eman dugu eta hobeto edo okerrago bukatu da. Prozesu hori beste era batera eramatea egokiagoa izango litzatekeela? Seguru asko, baina bakoitzak dauka bere erantzukizuna.

-Baina egin al da saiorik beste ildoko jendea zerrendan sartzeko edo ez da egin?

Unanue: Behin zerrenda onartu zenean, zerrenda itxitzat eman genuen. Gure batzarrak soberanoak dira eta erabakiak hartzen dira.

-Baina boto bakar bateko aldea zegoela ikusita...

Unanue: Hori apustu bat izaten da eta kito.

-Eta zer dela-eta bi ildo horiek?

Unanue: Gurea ere ez delako alderdi monolitikoa eta oso sentsibilitate desberdinak egoten direlako. Sentsibilidade hori pertsona batek aurkeztu edo beste batek aldea egoten delako. Ez da berdina aita gurea batek errezatu edo beste batek.

-Bi zerrenda aurkezterainoko aldea al dago?

Unanue: Hemen gauza bat argitu behar dut: zerrenda bakarra zegoen. Hau da, zerrenda herriko batzordeak edo mahaiak egiten du eta berak aurkezten du batzarrean. Azpeitiko EA barruan herriko mahaiak egin zuen zerrenda, aurkeztu zuen batzarrean eta batzarraren gehiengoak onartu egin zuen. Orduan, beste zerrendarik ez da aurkezten eta, beraz, ezta bozkatzen eta onartzen ere. Herriko mahaiarena eta kitto. Gure zerrenda ez balitz onartu, mahaiak beste zerrenda bat aurkeztuko luke, beste pertsona batzuekin eta abar, baina hori ez zenez Azpeitiko kasua...

-Baina jakinekoa da gaur egungo lau zinegotzietatik hiru ez zeudela zuen plantxan eta kanpoan geratu direla.

Unanue: Guk zerrenda egiten jardun genuenean, hartu-emanak denekin izan genituen eta horren arabera bere zerrenda planteatu zuen. Gertatzen da batzuek beste pertsona batzuk nahi zituztela.

• Di-da batien Julian Eizmendi
• Di-da batien Manuel Unanue