Iritziak

Pilotak eta mendiak

Fernando Morillo

Erronka beti zaigu erakargarri. Azken finean, geure buruarekin edo ingurukoekin izandako lehian egiten dugu aurrera behin eta berriz. Baina mota askotako erronkak eduki ditzakegu. Azpeitiarron eta Azkoitiarren arteko lehia aski ezaguna da, adibidez: beti elkarrekin eta beti elkar zirikatzen, nor baino nor nabarmenagoa eta zorrotzagoa. Lehiaketa horretako azken tantoa (Otaegiren eskuari esker) gure alde etorri denez, Azkoitiarrak hasi omen dira esaten Azpeitiko kaleak zabaldu egin beharko direla, kabitu ezin izango garela eta. Baina toreatzaile bila omen dabiltza jada, jokoa parekatu nahian edo.

Erronkari helduz, ez nuke amaitu nahi beste bat gogoratu gabe: natura (gordinaren) eta giza-nahimenaren artean gertatutakoa. Alegia, mendizalearena. Urrun, Pumori aldean, hil ziren haiek pixka bat hurbilago senti ditzagun, agian. Ez adiorik.