Pumori : Azpeitian, Aizarnazabalen eta Aizarnan izango dira ekitaldiak; bien gorpuak Pumorin gelditu dira betiko

Azaroaren 3an agurtuko dituzte Beñat Arrue eta Iñaki Aiertza

Enekoitz Esnaola

Egun zail eta nahasien ondoren, gauzak pixka bat behintzat lasaitu dira, eta Beñat Arrue azpeitiarra eta Iñaki Aiertza aizarnazabaldarra larunbat honetan –azaroaren 3an– agurtuko dituzte, Azpeitian, Aizarnan eta Aizarnazabalen. Bi gazteak –Cesar Nieto, Javier Arkauz eta Aritz Artieda nafarrekin batera– urriaren 17an hil egin ziren, Pumori mendiko (7.161 metro, Nepal) tontorra egin nahian zebiltzala; 6.300 metro aldera ustez izotz-jausi bat izan ondoren hil ziren. Benantxio Irureta aizarnarra –Azpeitian bizi da 22 urtean–, Xabier Osinalde azpeitiarra, Xabier Ostolaza eta Jon Odriozola zestoarrak eta Jexux Mari Errazu aizpurutxoarra ere espediziokideak ziren, baina hauek beherago zeuden eta libratu egin ziren ezbeharretik.

Ondorengo orduak eta egunak nahasiak eta zailak izan ziren. Batetik, istripua gertatu eta gutxira Nepaldik etorri zen informazioa ez zen zabala izan, eta zer gertatu zen ere ez zegoen oso garbi. Behin jakin zenean, ordea, zer gertatu zen eta zein ziren hildakoak, erreskatearen kontua etorri zen, eta horrek zaildu egin zuen espediziokideen egoera.

Benantxio bera izan zen Pumoriren magalean –Everesteko beheko kanpamendu ondoan– bi gorpu ikusi zituena, baina haiek erreskatatzea «oso arriskutsua» zela esan zuen, elur-jausiak bukatzen diren tokia delako hura. Nafarroako Gobernua, ordea, prest zegoen hiru nafarrak erreskatatzeko baliabideak jartzeko. Nafarroako Gobernuko inor ere ez zitzaien zuzendu Pumoriko espediziokoei, ez aholku eske, ez laguntza eskainiz, eta hori ez zitzaien «batere gustatu» Urolako mendizaleei. Urriaren 25ean gorpuak erreskatatzen saiatu ziren italiar batzuk –Beñatena han uzteko esana zuen familiak–, Edurne Pasabanek eta baita taldeko hiruk lagunduta ere, baina Benantxiok aurreratu bezala, ezin. Han geratu dira, beraz, gorpuak.

Urriaren 27an iritsi ziren espediziokoak etxera. Larunbatean agurra egingo zaie Beñati eta Iñakiri, lagunek antolatuta.

• Beñat Arrueren datuak
• «Zorte txarra izan dugu, gauzak oso-oso ondo ari ginelako egiten» Enekoitz Esnaola
• Arkaitz goikoetxearen bertsoa
• Azken hamar urtean herriko beste lau gazte hil dira mendian
• Zer amets huen, Beñat? Iban Arregi
• Lehen 'Takolo beka' taldeari