Iritzia : Akuilua

San Joan su birtualak

Fernando Morillo (Idazlea)

Suak beti sortu du halako lilura gugan. Garai batean –hori diote–, sutzarrak pizten ziren zerua eta lurraren arteko harremana areagotzeko, eta kondairak azaltzen ziren haren inguruan. Gure San Joan suak dira errito zahar haien oroigarri.

Mugida galanta izaten zen guretzat San Joan suen kontua. Norgehiagoka gogorrak genituen inguruko kalekoekin, ea nork egiten ote zituen su handienak, ikusgarrienak; ea non irauten zuen garrak gehien. Orduak eta orduak pasatzen genituen suari begira. Ederra zen.

Azpeitia, ordea, hiri bihurtzeko bidean da itxuraz, eta ez dago ja gauza horietarako tokirik. Ez ote zaigu Bilbon bezala gertatuko? Alegia, plastikozko behiak jarri behar izan dituztela han-hemenka, nolakoak diren gogora dezaten. Lekurik ez eta, suak –gure grinak berak!– birtuala izan beharko du laster. Behiak –benetakoak– omen dira, gero, jota daudenak…