Pumori espedizioa : Patxi Ibarbia (mendizalea)

Animo!

Ekainak 22 da eta Amsterdamdik idazten dut, ‘Transeuropa 2001’ zeharkaldiko une bat aprobetxatuz. Orain dela hamar urte, berriz, Nepalen nengoen, eta, hain zuzen, Pumorin. Kumbuko glaziarera iritsi eta han ikusi nituen Everest, Nuptse eta Lhotse, baina han azaldu zen, era berean, Pumori, mendi dotore askoa, polita, izugarria. Eta gauzak nola diren: Pumorin bertan nengoela sortu zen ‘Transeuropa’ egiteko ideia, zeharkaldi honetako kide bat –Luis Angel Rojo Gorri– han ezagutu ostean.

Neuk ez nuen orduan tontorra egiterik izan, baina asko gozatu nuen. Ea Benantxiok, Beñatek, Xabierrek eta konpainiak ere asko gozatzen duten beraien artean, Nepalgo jendearekin eta Pumorirekin. Hemendik neure animo eta indar guztiak bidaltzen dizkizuet. Eta gogoratu garrantzitsuena egina dagoela: zuen amets hori egia bihurtzen ari da.