Iritzia : Akuilua

Inkesten koloreaz

Fernando Morillo (Idazlea)

Duela gutxi, Azpeitiko gazteoi zuzendutako inkesta bat betetzea egokitu zitzaidan. Ez dirudi ideia txarra, aldez aurretik behintzat. Baina, egia esan, ez dut sekula oso garbi izan horien zintzotasuna. Galdera batentzat, askotan, bizpahiru erantzun posible dago. Eta kitto. Zuria, beltza edo ez daki/ez du erantzuten. Horrek arazoak dakartza, noski. Zuria naiz? Beltza? Hirugarren talde xelebre horretakoa? Besterik ez?

Ez da hori, ordea, egon den inkesta bakarra. Inkesta guztien ama ere bete baitugu; alegia, hauteskundeena. Honen itzalean, baina, arrisku handiagoa ezkutatzen da. Hemen ez da soilik kolore eskasia. Gutxi balitz, emaitzen interpretazio maltzurrak datoz, zuria beltza dela esanez, eta beltza zuria. Edo, areago, gogoko kolorerik lortu ez, eta heldugabetasuna aurpegiratzen digute.

Tamalgarria izango ez balitz, gustura egingo nuke barre.