Iritzia

Agintariak eta Eliza

Kepa Susperregi

Agintarien arteko haserrea» izenburua eskaini zion Imanol Eliasek, aldizkari honetan, aurreko aleko artikuluan. Duela 350 urte inguru Azpeitian gertatutakoa aipatzen zuen. Andre Mariaren jaiotza eguneko elizkizunean sermoia egiteko aukeratu ez zutela eta haserreturik, garai hartan Parrokiako Erretore zenak azaldu zuen jokabideak, haserre bizia sortu omen zuen herriko agintarien artean.

Garai bateko kontuak utzi eta, egunetara etorriz, biziki haserre somatu genituen, iragan otsailean, Espainiako zenbait politikari Gotzainen erabaki batekin. Espainiako Gotzain Batzarrak ez zuen izenpetu nahi izan PP eta PSOEk aurrez hitzartutako «Askatasunaren alde eta Terrorismoaren aurkako Akordioa». Hitz gogorrak entzun ziren, salaketa latzak. Denak agintarien haserrearen adierazpen.

Esanak esan, ezinbestekoa du Elizak bere sinesmena aldarrikatzea, Ebanjelioari hots egitea. Berezkoa du, hitzez eta ekinez, gizarte-zerbitzuan saiatu beharra; bere iritzian, Ebanjelioan oinarritzen diren irizpideak eskainiz.

Bere egitekoen artean daude, hain zuzen: edozein pertsonak duen bizitzeko eskubideari zor zaion errespetua aldarrikatzea; sofritzen ari direnetaz errukitu eta hurbil egotea; edozein pertsonak bere iritzi politikoak legezko bideetatik adierazi eta zabaltzeko duen eskubidea gogoratzea; hitz egitea onuragarria dela sinesturik, giza-talde eta talde politikoen arteko elkarrizketa eta harremanak piztea; zigortuen giza eskubideak zaindu behar direla oroitaraztea.... gizarte adiskidetzearen eragile izatea.

Ez dugu, ez, lan makala etorkizunerako, guztion artean bakea guztion alde eraiki nahi badugu.