Kirola : Ezustean esan du adio atleta ohiak, entrenatzen ari zela hil egin baitzen

Agur, Diego

Enekoitz Esnaola

Diego Garciak ezustean esan du agur: lehengo larunbatean (martxoaren 31n), entrenatzen ari zela, bihotzekoak jota. 13:20 inguru ziren, eta Alejandro Gomez galiziarrarekin batera ari zen entrenatzen. Azkoititik bueltan zetozela, Loiola iristear, «gelditu, gelditu!», esan zion Gomezi, eta gelditu, bihotza gelditu zitzaion Diego Garcia atleta ohi handiari. Hantxe hil zen. Kolpe handia izan da haren herriarentzat —Azkoitiarentzat— eta azken urteetan bizi zen herriarentzat —Azpeitiarentzat—. 39 urte besterik ez zituen, eta, atletismo profesionala utzi berritan, sasoian zen. Diego hil eta hurrengo egunean izan ziren hileta elizkizunak, Azkoitian. Mundu bat bildu zen. Aurretik, Azkoitia-Azpeitia korritu egin zen, haren omenez.

Bihotz-gogorra dugu Jainkoa,

Jainkorik baldin badago;

Diego zergatik hil da, ordea,

garaia baino lehenago?

Hainbeste amets ta ilusio

kolpe batean akabo.

Kirolari fin, lagun ta gizon

berdinik ez da izango,

Euskal Herriak asko galdu du,

maite gendunak gehiago.

Xebaxtian Lizaso (hileta egunean abestua)

• Datuak
• DIEGO GARCIAK ESANA
• Maratoiko soldadua Enekoitz Esnaola
• Gure ondoan Txetxu Urbieta (Euskadi Irratiko kirol kazetaria)
• Naturala hintzen, Diego Andoni Egaña - Bertsolaria eta idazlea