Iritzia : Akuilua

Txikiteroen desagertzea?

Fernando Morillo (Idazlea)

Behin, ba omen zen ohitura bitxiko familia bat. Adin batera iristean, familiako guztiek, nahitaez, eskuko hatz bat moztu behar zuten. Halako batean, musikari bat sortu zen familia hartan. Gitarra jotzea zen gehien maite zuena, eta imajina daitekeenez, ez zitzaion asko gustatu hatzaren kontua. Zalantza handien ondoren pikutara bidali zuen ohitura. Gitarra behar zuen! Baina horrek, familia osoaren suntsiketa eragin zuen azkenean.

Istorioa, gizon batek azaldu zidan kezkarekin lotzen da. Inguruotan, zioen, ohitura zaharrak galtzen ari gara. «Betiko» ardoa utzi, adibidez, eta edari «berrietara» jo omen dugu. Txikiteroak desagertu egingo dira! Eta era berean, jarraitu zuen, beste hainbat eta hainbat gauza.

Zein hautatu, ordea: musika suntsitzailea, edo ohitura tiranikoa? Ez da erabaki erraza. Olentzerok ba ote du erantzunik? Edonola ere, urteberri on!