Iritziak : Akuilua

Kilolitroak

Fernando Morillo

Eguraldi hotza. Tristea. Zerua izugarri lainotu da azkenaldian eta gu ere antzera gabiltza. Lainotsu. Udazkenagatik izango ote da? Azken batean, udazkenak beti izaten du ilun itxura. Edozein modutan, tristurak badu bere aurpegi ederra ere. Behintzat, gero kontraste gisa jokatzeko. Eta hori, gutxi bai, baina bada zerbait.

Bestalde, proposamen berri bat entzun izan dut han-hemenka. Kilometroak festarekin dago lotuta. Zehazkiago, goiz osoan egin zigun euri jasarekin. Eta proposamena: Kilometroak deitu beharrean, hemendik aurrera Kilolitroak bezala izendatzea. Bota zituenak ikusita —eta jasanda—, beharbada egokiena izango litzateke. Horrela, Ikastola, urratsez urrats eraiki beharrean, litroz litro jasoko genuke. Aproposagoa, zalantzarik gabe. Hori bai, gero, adarra jotzeko, eguraldi ero honek lehortea ekarriko ez baligu, behintzat.