Saninaziyuek : Inma Aramendi (Udaltzaingoa)

«Festa lasaiak dira, bihurrikeriren bat gertatzen bada ere»

Aurten hirugarren urtez egingo du lan Inmak udaltzain bezala. Gustora dago, aurten arratsaldez baitu lana.

Festak hasi baino lehen festak pasatzeko desiatzen dago Inma Aramendi, lan egin behar duelako batik bat. Bestela, Saninaziyo festak gogoko ditu.

Udaltzainei festetan erabat aldatzen zaie lana, egunerokotik ateratzen dira. Hala ere, festetan baino aurreko egunetan lan gehiago izaten dute udaltzainek. «Aurreko prestakuntza lanak gehiago dira, atrakzio desberdinei lekua eman, pitxiak saltzera etortzen direnen artean lekuak banatu. Trafiko aldetik ere dena aldatzen da, gero zezenetarako ere prestaketak egin behar izaten dira», azaldu digu Inmak. Festetan egiten duten lan nagusiena zaintzarena da, eta lanean ere denbora gehixeago pasatzen dute: «Festetan-eta lan bat hasi baduzu, hura bukatu artean jardun behar izaten duzu».

Ordea, arratsaldeko lanorduetan lan egitea suertatuz gero, parranda eta festez gozatzeko aukera handiagoa izaten dute udaltzainek. Horretan suerteko da Inma, aurten arratsaldeko txandan lan egingo baitu.

Aurten, festetan ibiliko den jende andana «izugarria» izango dela uste dute udaltzainek.

«Saninaziyoak lasaiak dira; gauza txikiak gertatzen dira, lapurreta txikiak -eta, bihurrikeriak gehienbat. Kotxeak gaizki aparkatuta...», dio Inmak.