Antzerki Topaketak : 18an da, Alaitz Olaizolak idatzi du ‘Zereko zera...’ lana

Lakrikumen obraren estreinua

Lakrikun taldea.    (Udala)

Metro batean eskale bat bizi da, eta handik jende ezberdina pasatzen da... Eguberriko egun normal bat metro batean kontatzen da». Alaitz Olaizolak idatzi du Zereko zera zertzen delako, zereko zerarekin izeneko obra, eta Lakrikum Azpeitiko taldeak hilaren 18an Zelaitxo antzokian estreinatuko du. Eta definizio hori eman digu egileak berak, antzezlana nolabait deskribitzeko. Obra guztia esaera zaharrez betea dago. «Era horretan, esaten denari sinesgarritasun handiagoa» eman nahi izan dio Alaitzek.

Hark idatzi eta Idoia Urangak zuzendutako antzezlanak ordu eta erdi inguru iraungo du, eta zortzi aktorek taularatuko dute. Gainera, azpeitiarren lanarekin emango zaie amaiera aurtengo Antzerki Topaketei.