Gipuzkoako Bertsolari Txapelketa

Joxe Agirreren azkena

Ziurrenik Joxe Agirreren azkenengo txapelketa izan da honakoa. Agirrek berak esan digunez, «berriro txapelketa batean parte hartzea zaila izango da». Gainera, aurtengoan taldekakoa izan delako irten duela dio. «Banakakoa balitz ez nukeen berehalakoan parte hartuko». Txapelketak ez ditu sekula gustuko izan: «Ez dut sekula gogorik izaten txapelketetan parte hartzeko; asko sufritzen dut, oso urduri jartzen naizelako».

Bestela, txapelketa honetan uste baino gusturago ibili dela esan digu Agirrek. Bide horretatik, gazteekin oso gustura ibili dela dio: «Oso ondo konpontzen naiz gazte jendearekin, jatorrak direlako». Bertsolari edadetuen artean gazteekin gehien ibiltzen dena bera dela azpimarratu du, gainera. Txapelketan jarri dizkioten gaiekin ere «kexatzeko arrazoirik ez» duela nabarmendu du.

Txapelketetan pasatzen duen urduritasuna deskribitu zuen Agirrek Oñatiko azken agurrean. «Saioen aurretik estuasun handiak pasatu ditut, eta hori islatzen du bertso horrek». Oñatin botatako hau da txapelketa batean Joxe Agirre handiak bota duen azken bertsoa:

Erreparua hartu

aitonan hitzari:

zahartu ta heldu diot

aldapa latzari;

nolako estuasunak

eman bihotzari,

zati bat kentzen ai naiz

nere bizitzari,

ta eskeiniko diot

bertsolaritzari.