Udalak eta Uztarriak adostasuna lortzeko aukera dago

Urtarrilean Udalak egindako eskaintzaren ondoren, euskalgintzak akordioa ixteko sei puntuko proposamen zehatza egin dio

Euskalgintzak Azpeitian euskara normalizatzeko planaren diseinuan eta eguneroko lanean parte hartzeko Uztarriak Azpeitiko Udalari abenduan elkarlanerako aurkeztu zion proposamenaren ondoren, urtarrilaren 15ean Udalak bere eskaintza luzatu zion Uztarriari, eta euskalgintzak adostasuna lortzeko aukerak ikusten ditu: "Gure ustez, Udalak aitortzen du Uztarriak (euskalgintza biltzen duen erakundeak) beste status bat behar duela euskararen normalizazioa gidatzean. Uztarriak eguneroko lanean ere parte hartu behar duela dio Udalak. Eta herriko eragileek Bai Euskarari Ziurtagiria har dezaten, haiei gonbitea egingo zaiela".

Bilera horren ondoren, eta akordioa lortzeko asmoz, Uztarriak lehengo bere proposamena sakondu eta zehaztu egin du, eta Udalari eman dio, baita Aholku Batzordeko kideei ere. Laster egingo dute bilera Udalak eta Uztarriak.

Urtarrileko bileran, dena dela, biak ez zeuden ados Urola-Kostako Hitza-ren inguruan; Uztarriak uste du akordioan sartu eta diruz lagundu behar dela, "Hitza oso garrantzitsua izango delako euskararen normalizazioan. EBPNk berak dio estrategikoa dela herri komunikabideena".

• Azpeitiko Udalaren proposamena
• Uztarriaren proposamena: Aukera ona daukagu euskararen normalizazioari begira herrian