“Babesa-n sortzen ditugun barruko elementuak eta zerbitzua euskaraz daude

Uztailaren 19an eginiko ekitaldian herriko 25 erakundek Bai Euskarari Ziurtagiria jaso zuten. Babesa denda izan zen haietako bat (Urbitarte 9).

Zergatik hasi zen Babesa Gazte Moda Bai Euskarari Ziurtagiria prozesuarekin?

Pentsatzen dugu euskarari bultzada eman behar zaiola. Azpeitian euskara nahiko ondo dagoela iruditzen zaigu beste leku batzuekin konparatuz, baina hemen ere bultzada eman behar zaio.

Zer konpromiso hartu ditu Babesak? Eta nola ari zarete konpromiso horiek garatzen?

Gu saiatzen gara zerbitzua ahal den gehien euskaraz ematen: lehenengo hitza, etiketak... Azken batean, iruditzen zaigu jendearengana hori iristen dela. Barruko elementuak (paperak...), guk sortzen ditugunak, euskaraz dira. Beste elementu batzuk (programa informatikoa, esaterako) gerora begira euskaratzea pentsatzen dugu.

Zer suposatu dizue Bai Euskarari Ziurtagiria lortzeak?

Jendea gero eta gehiago fijatzen da gauza hauetan. Zerbait suposatzen al digun? Irudi bat da. Pauta batzuk segitzen ari bazara urteetan zehar (publizitatea euskaraz...), horren zigilu bat bezala da hori. Guk urte asko daramatzagu euskaraz funtzionatzen, baina gu euskaraz funtzionatzen hasi ginenean ez zen horren garbia merkataritza aldetik euskaraz egitea. Azkenean zigilu bat da, euskaraz lanean ari zarela adierazten duena.

Bai Euskarari Ziurtagiria, euskararen normalizazioa lortzeko bidean, beharrezkoa iruditzen al zaizue?

Bai, izan daiteke. Baina ondo zabalduta, lan asko eginda, erakunde handiei indar handia eginda... Azken batean, erakunde txikiek konpromisoak hartzea ona da, baina lan handia egin behar da erakunde handien atzetik, gauza guztietan gertatzen den bezala. Baina izan daiteke bide eta tresna egokia, ondo bultzatuz gero eta gauzak ondo eginez gero.