Baita zuri ere!

agurra | Nerea Aranguren |  2005/10/3  09:45

Hemen gara, bada, azpeitiar -tartean, azkoitiar bat- talde bat sarean, irakurri edo ikusi nahi dituenarentzat gure gogoeta, pasadizu , argazki eta zeresanekin uztarria.com-eko bisitariak gozarazteko, gogoeta egitera bultzatzeko eta zirikatzeko prest. Batzuk bikoteka, besteok bakarka. Nahi dugun doinu eta neurrian; hori bai, Azpeitia eta azpeitiarrok gai hartuta.

Bloga da, bada, zuengana iristeko aukeratu dugun bitartekoa, “estilo pertsonal eta informalez idatziriko bitakora edo nerabe-egunkarien tankerako testua”, begiratu ditudan web-orri eta aldizkarien arabera. Blogen txoko honetan aurkituko gaituzu, beraz, blogile bakoitzaren emariak ere baldintzatuko duen arren, astean behin gutxi gora-behera berrituko ditugun kontakizunekin.

Niri dagokidanez, ardatz beraren bi muturren artean arituko naiz solasean gehienetan: azpeitiarkeria eta azpeitiartasunari, edota nahiago bada, azpeitiartasuna eta azpeitiarkeriari buruz. Ez naiz, ordea, oreka mantentzen ahaleginduko, ezinbestean. Azpeitiartasuna aski barneratua dugun ezaugarria den heinean, azpeitiartasunera lerratuko bainaiz lehen blogetan; nahikoa harrotutako ogiak ez baitu legami gehiago behar. Jakin ezazu, baina, erantzuteko aukera ere baduzula; eta lehen blog hau ofizialegia irten bada ere hurrengoetan izango dugula iritziak tartekatzeko aukera, irakurle.

Oharra: “Agurra” zen berez blogaren izenburua, baina azpeitiarrok hain sarri erabiltzen dugun eta aurretik agurrik esan gabe hain lehorra den agurrak merezi zuen hainbeste.