Gaia: saioa.

««Itzuli blog osora

‘Xapios’ taldea txapeldun Gaztetxean.

Finaleko saioa. | Erniarraitz |  2007/01/2  12:49

Finala uste bezain bero eta bikain gertatu zen. Giro aparta zegoen, jendez gainezka, txapelketa guztian zehar izan duen jarraipen eta berotasuna areagotu egin zen finalean. Saioa atzerapen pixka batekin hasi zen Ander Urbietak izan zuen ondoez txiki bat tarteko. Saioan zehar ere izan zuen eragina MAK taldearen errendimenduan. Agurrean bertan sumatu zen talde batek nahiz besteak zekarren aldartea. Agur bana jarriko dugu lekuko gisa.

 
AGURRAK

Jokin Sudupe (Xapios)

Bertso Parrandan iturria ere
oraindik ez da agortu
ta Gaztetxean ikusten danez
giro ona zaigu sortu
hona bidean bi burutapen
honelaxe zaizkit otu
gaurko saioaz gozatu eta
ahal bada txapela lortu.

 
Ander Urbieta (Mak)

Gabon, zahar eta gazte,
Aitton ta amonak.
Zer moduz pasa dira
aurtengo Gabonak?
Orain hasiko dira
gure bertso bromak.
A, ta atzoko partez
danoi zorionak.

 
Saioan zehar izan ziren momentu oso onak eta baita erantzun bikainak ere. Adibide gisa:

 
Ofiziotan Zortziko Handian, Silvia eta Josu neska mutilak ziren. Pelikula erromantiko bat ikustera gogoz kontra joan da Josu, baina argia piztu denean negar egin duela igarri dio neskak.

 
Silvia:

………
Negar egizu nire aurrean
biok pertsonak gara ta.

Josu:
Nahiz pelikula gaur iruditu
zaidan oso atsegina,
jakin ezazu orain barnean
nik badaukadala mina.
Nola golpetik sortua zaidan
gaur sexurako den grina
eta tamalez ez degu egiten
pelikulako berdina.

 
Silvia:

Hori aitzaki bat besteik ez da
ez det egiten zalantza,
irudi triste hoiekin zuri
barrenak hamaika dantza.
Ta sexu grina omen dezula
gaur aitortu dezu antza.
Jo ba, eskatu. Uste nuen nik
bagenula konfiantza.

Zortziko Txikian izan zen saiorik politena behar bada, eta osorik jarriko dugu.

Larunbat gauero hamabiak aldera Xabier, amonatxoak, Gaztetxera etorri eta kubalibre bat eskatzen du. Mini da barrako arduraduna.

Mini:

Ikusi beharra da
amonaren planta
burua okerturik
ta baita’re hanka.
Gaztetxeagatikan
ez dabil marmarka
‘Aitonenan’ baino’re
merkeago data.

Xabier:

Gaztetxe barruraino
ni erdi presaka,
beste taberna denak
albora lagata.
Hemen merkeago, ba,
atera kubata,
lo egiteko oso
gauza ona da ta.

M: Lo egiteko orduan
hainbat enbarazu,
nahiz Jaungoikuai egin
hamaika errezu.
Gazte artean ondo,
ederki zaude zu.
Kresta bat egitea
pentsatu al dezu?

X: Hori entzundakuan
eman didazu min,
holakua zinanik
oraindik ez nekin.
Krestaik ez det egingo
zergatia jakin,
ilerik gabe ezin
delako hau egin.

M: Ilearekin dezu
orduan problema,
baina ez pentsa denik
gauzarik txarrena.
Beste kubata hartu
zuk barran barrena
etxearen kontura
baidezu hurrena.

X: Bi gehiegi direla
ordea kontura.
Zertan hartu behar det
hemen abentura,
baina gogoan daukat
ez zuk izan duda
ta hurrengo astekoa
zerorren kontura.

Bakarkako lanean Xapios taldeko bi ekarriko ditugu, biak izan ziren eta politak:

 

HITZA: Eskola

Xabier Azpillaga

Bertso-eskolan daramakigu
guk azkeneko bolada,
afiziua hauxe dugu ta
ezin ba alde bat laga.
Zuen artean inbidirikan
sentitu duenik bada
ateak zabal-zabalik daude
zatoz Bertso-eskolara,
asteazkenez biltzen gara.

OINAK: Aparta, galanta, falta, da ta

Silvia Etxaniz

Ene, hau da anbiente
bero ta aparta.
Bertso Parrandak sortu
du giro galanta.
Jendearen txalorik
behintzat ez da falta.
Zuek holaxe segi
eskertutzen da ta.

Ondoren puntutako lanak izan ziren, horretan dute gazteek eskarmenturik gutxien eta biziago aritu ziren ohi bezala MAK taldekoak. Azkenean epaimahaiak XAPIOS izendatu zuen txapeldun eta MINIk gizalegez onartu zuen erabakia bere agurreko bertsoan aitortu zuenez, izan ere bigarren urtez izan baita bigarren:

 
Mini

Hauek hobeto jardunak dira
nahiz gu ez egon erdi lotan.
Beti atzetik ibilia naiz,
bigarrengoz aurtengo hontan.
Neure buruai esaten diot,
“lasai Ministro!”, askotan.
Sateliteak egon behar dira
izarrak egotekotan.

Agur zoriontsua eman diogu bada 2006ko Bertso Parrandari eta zaletasuna zabaldu eta bertsoa kaleratzeko ahalegin horretan bere fruituak eman dituen ustez amaitu ere. Eskerrik asko denei, tabernari, bertsozale eta bertsolariei. Berotasun horren aparra jaisten denean Erniarraitzen inguruan, Bertso-eskolarako nahiz beste lanetarako jende berririk etorriko den ustetan, aurrera ere bertsoaz gozatzen jarrai dezagun. Hurrengo erronka otsaileko Bertso Asten izango dugu. Urte berri oparoa.

Lotura zuzena  |  Erantzun

 

'Mak' taldea finalera

Trintxerako saioa. Bertso Parranda | Erniarraitz |  2006/12/18  17:32

                                     

Azken finalerdia hirigunetik urrun, Errezilgo Trintxera jatetxean izan bazen ere, orain arteko saio guztien bidetik arrakastatsu eta jendez gainezka izan zen bada. NESKAK  eta MAK taldea ziren aurrez aurre. Saioa ona izan zen oro har eta momentu ederrak izan zituen tarteka. Zortziko txikian Minik eta Leirek egin zutena, esate baterako. 50na urteko senar-emazteak ziren, inoiz oporretara joan gabeak eta senarrak, Leireri tokatu zitzaion paper hori, Kubara bidaia egiteko proposamena egin zion, Mini emazteari. Saioko bertsorik politenetakoak bertan izan ziren. Emaztea hasi zen Kuba aldea gerria mugitzeko leku aproposa zela esanez eta hala erantzun zion senarrak:

Zerbait ba omen dago
hango eguzkian
berotzen dakiena
mugitzen hastian
ta gozatuko dezu
palmera azpian
gozatu ez dezuna
bizitza guztian.

 
Eta Miniren erantzuna ere polita izan zen

……
neska kubanita bat
bazaizu komeni
Diniokin ederki
ibiliko naiz ni.

Bakarkako lanetan ere bi hauen eskutik etorri ziren alerik politenak. Hitza gai emanda ‘malkoa’ izan zuen Leirek eta bere aurrean entzule zuen Maider Egiguren preso ohiari kantatu zion berarekin topo egiteak sortu zion zirrara, malkoa atera ziola adieraziz. Handik berehala zen Mini bakarkako lanean eta ‘irria’ hitza zuen kanturako gai. Maiderri kantatu zion honek ere, askatasunaren poza gogora ekarriz, eta honela amaitu zuen bertsoa:

……
zuen malkoa irri batekin
errez sendatu daiteke.

Ordurako ere behar bada egokiago ari ziren MAK taldekoak, baina puntutako lanean borobildu zuten beren lana. Errezilgo hiru bertsolari historiko izan ziren saioari begira eta dotore asmatu zuten, Miniren ‘Baserriren’ imintzio eta guzti, beren buruei eta ondokoei barre egiteko. Amaieran bertso gosez zegoen jendea baina baita aurkezlea ere zirikatzaile zebilen eta Leirek eta Minik saio polit bat egin zuten puntutan. Ondoren Gorka Tolosa bera, Mini eta Ander ere animatu ziren elkar zirikatzera.

Finalean dena den MAK taldeko kideetako bat faltako da, ‘Kurku’, kanpora joan behar baitu. Lekukoa ‘Xenpelar’ azpeitiar gazteari eman diote eta MAK  taldea MAX bihurtuko zaigu finalean.

Txapelaren jokoan, beraz, abenduaren 29an, Azpeitiko Gaztetxean, 23:00etan:

XAPIOS: Xabier Azpillaga, Jokin Sudupe 'Pio' eta Silvia Etxaniz

MA(K)X: Haritz Etxeberria 'Mini', Ander Urbieta, eta Josu 'Xenpelar' izango dira.

Lotura zuzena  |  Erantzun

 

‘Xapios’ taldea txapelaren bila

Etxe Aitzeko saioa. Bertso Parranda | Erniarraitz |  2006/12/4  11:18

                                        

Azkoitiko Etxe Aitz lepo beteta zela jokatu zen Bertso Parrandako lehen finalerdia. Azkoitiar kutsua zuen saioak eta ez Azkoitian zelako bakarrik, hiru azkoitiar gazte baitziren bertan kantatu beharrekoak, bi 'Xapios' taldean, Jokin “Pio” eta Silvia Etxaniz, eta Lide Rekondo 'Jolin' taldean bestea; eta Jokin Uranga, azpeitiarra bada ere, behin ere ukatzen ez duena bere amaren aldeko azkoitiar jatorria. Bertsotan ofiziotan Torriako Aterpetxean jarri zuten gaian ederki baliatu zuen bere jatorriak han zituela adierazteko.

Saio oso ederra eta orekatua egin zuten bi taldeek. Esan daiteke ofiziotako eta bakarkako lanak amaitu zituztenean ‘Jolin’ taldearen alde egongo zela balantza, baina puntutako lanak erabaki zuela ‘Xapios’ taldearen alde, aurrez irabazitako aldea galdu zuten bada lan horretan. Lide Rekondo bere urtebetetzeko oparirik gabe gelditu zen, puntu erdi  ziztrin batengatik.

Aipagarria da aurtengo honetan azaldu den gazte belaunaldiak erakutsi duen maila eta aurretik zebilen Jokin "Piok" egin duen hobekuntza. Esan behar da hiru hauez gain beste bi ere badabiltzala, Tibalt Alberdi, Mendizaleetan aurrekoan kantatu zuena eta ‘Neskak’ taldeko Eneritz Artetxe. Bost azkoitiar gazte, bada zerbait, baina Errezil ere ez da atzera gelditu, beste bi ordezkari baititu aurten, Eneritz Arzallus eta Nekane Zinkunegi. Azpeitiko mintegia dabil lehor xamar oraingoz, baina eman du ordezkari bat honek ere, Josu “Xenpelar”. Espero dezagun garai emankorragoen aurreko atsedenaldia izatea. Hor agertzen da bertso eskolak isilean egindako lanaren fruitua.

Zoriontzekoa berauek egin duten lana, duten zaletasuna eta, nola ez, hauei laguntzen, irakasten aritu diren bertsolari eta bertsozaleena. Bertso zaletasuna belaunaldiz belaunaldi igarotzeko biderik onena da hori, hauek baitira gazteagoen ispilu. Zorionak.

Aste hau berezi xamarra izaki, atseden hartuko du ostiral honetan Bertso Parrandak eta hilaren 15ean jokatuko da herri gunetik aparte oraingoan, Errezilgo Trintxeran. Txapelketari hasiera irabaziz eman zion ‘Neskak’ taldea eta ‘Mak’ taldea abiatuko dira Gaztetxerako txartelaren bila.  

 Beraz hurrengo saioa:

♦     Abenduak 15, TRINTXERA (ERREZIL): Gaueko 11:00etan

NESKAK:

·        Leire Ostolaza

·        Eneritz Arzallus

·        Eneritz Artetxe

MAK:

·        Haritz Etxeberria “Ministro”

·        Ander Urbieta

·        Eneko Ibarguren “Kurku”

 

AURKEZLEA: Gorka Tolosa

Lotura zuzena  |  Erantzun

 

‘Xapios’ taldea finalerdietara

Mendizaleetako saioa. Bertso-parranda | Erniarraitz |  2006/11/27  11:21

                                  

                                      

Azpeitian Mendizaleen tabernan jokatutako laugarren kanporaketa ere aurrekoen bide beretik arrakastatsu eta jendez gainezka izan zen. Eta Azkoitian Zurten bezala epaileei ez zieten lan erraza jarri bertsolariek, bai kantuan erakutsi zuten parekotasunagatik eta baita bukaerako agurretan lehenbizi kantatu zuten Xapios taldekoek beren burua galtzaile jo zutelako ere, eta haiexek izan epaileen ustez aurrerako sailkatu zirenak. Bertsolariek badakite hori ez dutela egin behar, baina behin eta berriz akats berean erortzen dira. Bertsolariek nonbait beren barne-sentipenetatik epaitzen dute eta epaileek haien ahotik irteten duena, hortxe diferentzia. Saio parekatua izan zen oso lehenbiziko hiru ofiziotako lanetan. Bakarkakoetan hobeto aritu zen XAPIOS taldea eta bukaerako puntutako lanean MIRUT hobeto. Kontuak kontu azken epaia emateko bertsoan Ixabel Jauregik, …“Xapiosen kordadak /lortu du gailurra” bukatu zuen bertsoa mendizale-hizkera erabiliz, baina izan zen zalantza argitu gabe gelditu zen bat baino gehiago. Dena den bertsorik txalotuenak lau oinak emandako biak izan ziren.

XAPIOS taldeko Silvia Etxanizek: burua, purua, helburua, ingurua hitzekin bertso hau bota zuen:

Keaz beterik dago
gure ingurua,
bateko zigarroa,
besteko purua
Leihotik aterako
nuke nik burua,
itotzea ez baita
gaurko helburua.

 
Eta MIRUT taldeko Ruben Gorrotxategik: irrika, xirrika, errepika, korrika  hitzekin botatakoa beste hau:

Ohera joan ginaden
presa ta korrika.
Beste gauz hortarako
bagendun irrika.
Zenbat gozatu gendun
elkarri xirrika!
Atzoko gaua nahi det
berriz errepika.

Finalerdiak honela gelditu dira, orain:

Abenduak 1, ETXE-AITZ (AZKOITIA): Gaueko 11:00etan

JOLIN:

• Jokin Uranga
• Lide Rekondo
• Nekane zinkunegi

 
XAPIOS:

• Xabier Azpillaga
• Jokin Sudupe “Pio”
• Silvia Etxaniz

Abenduak 15, TRINTXERA (ERREZIL): Gaueko 11:00etan

NESKAK:

• Leire Ostolaza
• Eneritz Arzallus
• Eneritz Artetxe

 
MAK:

• “Ministro”
• Ander Urbieta
• “Kurku”

Lotura zuzena  |  Erantzun