Gaia: jarriak

««Itzuli blog osora

Xebastian Lizasoren bertsoak

Bertso berriak... Onddoei jarriak | Erniarraitz |  2006/11/16  17:04

Hauek dira aste honetan Argian datozen bertsoak. Seguru badela azpeitiar bat baino gehiago lurralde haietan perretxikutan ibilia. Xebastianek esandako arrazoiekin bat ez datorrenik ere izango da norbait agian, nork daki. Aukera ederra du bertsoz erantzuteko.

Doinua: Pasaiako plazatik.

I
Ultzama aldetikan
dator arazoa
jasan ezina nunbait
jende erasoa
neurritikan kanpora
omen da jasoa
naturak emandako
opari gozoa.

II
Bilatuta onddoa
aguro saskira
kilo asko bilduak
gehiagon desira.
Onak dauden artean
hori komeni da
utzitakoak bertan
usteltzen baitira.

III
Buru argiren batek
egin omen plana
xox batzuek tarteko
konpontzen da dana.
Ordaindu beharko da
diru sari bana
lehen denentzako zen
naturak emana.

IV
Hesi ta aberetan
gaitza nabarmendu
hori «peajeakin»
ezinda zuzendu.
Nahiz ta lurrak emana
beretzako kendu
onddotara doanak
natura maite du.

V
Lotura klase asko
mendiakikoak
batzuek noizbehinka ta
asko betikoak
afizio ugari
daude modakoak
eskerrak asko dauden
ofiziokoak.

VI
Hizketan jakituna
edo ta ezjakin
gizakia arrotz da
natura gauzakin.
Ez da ezer konpontzen
lege berriakin
beraz, joka dezagun
gizalegeakin.

Xebastian Lizaso

Lotura zuzena  |  Erantzun

 

Bertso berriak... Bixitariei jarriak

Bertso jarriak | Erniarraitz |  2006/10/24  11:29

Bertso hauek Xebastian Lizasok Argiaren 2.058. alean argitaratu zituen. Gaur egun ere eguntasunik galdu ez dutelakoan, hara hemen kantatu, ikasi edo lagunen bati bidali nahi badizkiozu ere.

Doinua: "Uso zuria errazu..."

I

Lehengo ohitura klaseak
nazkatu eta aseak. (bis)
Herritar asko gogaitu gaitu
udazken hontan paseak
usoen ordez paratxutixtak
ekarri ditu haizeak. (bis)

II

Beren «egoa» puztera
lasaitasuna haustera. (bis)
Ezin ausartu prozesuari
bere bidean uztera
pake garaian etorri dira
indarrak erakustera. (bis)

III

Airetik eta lurretik
zaindu beharra hurretik. (bis)
Emaitza onik ez dela lortzen
mehatxu ta beldurretik
badadukate zer ikasia
eskean hasi aurretik. (bis)

IV

«Mandoak» iragarriak
hirurehun bat ekarriak. (bis)
Kamioi batek hiru zapaldu
oihu ikaragarriak
ta hitzik ere ezin atera
zapaldutako herriak. (bis)

V

Militarrak zenbat urte,
aginte eta bertute. (bis)
Herritar batzuk nahiz aurka egin
inbasioaren truke
«izar» batzuek egunez ere
argia egiten dute. (bis)

VI

Jaurlaritzaren papela
hutsala eta epela. (bis)
Joateko esan eta joan ez
erakutsiaz horrela
autonomien autonomia
biluzik gelditu dela. (bis)

Xebastian Lizaso

Lotura zuzena  |  Erantzun