Gaia: bertsoak

««Itzuli blog osora

Pertsona ala abereari jarriak

Imanol Lazkanoren bertsoak | Erniarraitz |  2007/03/22  16:50

 

Imanol Lazkano

Hara hemen aste honetan Argiak dakartzan bertsoak, kantatzeko nahiz ikasteko.

I

Mundu zahar honi begiratuta
dago aitortu beharra
denen gainetik azaltzen dela
gizakiaren indarra.
Baina begira nora daraman
duen adimen azkarra
bere senaren aurka dabilen
abere mota bakarra.

  II

Betidanikan izan direnak
zorionaren barruti
sendia eta lagunartea
egin ditugu lau zati.
Hirian bizi bagara ere
bihurtu gara basati.
Jende ugari dugu ondoan
baina pertsona urruti.

III

Zerbait maitatu beharra dakar
bizitzak bere muinean.
Nik ingurua ta inguruak ni
hori da azken finean
pertsonekiko maitasun hori
garrazten doan heinean
gozo guztia isurtzen dugu
beste abereen gainean.

IV

Aurrerapen ta inbentuekin
gizona dabil harro ta
hau dugu irin gozorik eho
ezin dezakeen errota.
Azken batean ez al da dena
gizakiaren porrota?
Zakurrak eta katuak maite
eta pertsonak gorrota.

V

Bihotz oneko hainbat pertsona
nonahi aurkitu daitezke.
Abere mota guztientzako
maitasun ta babes eske.
Hainbat pertsona gosez ta gudan
bizi ez direnak aske.
Haien bizitzak ez ote dira
abereenak hainbeste?

VI

Abere mota denak direnez
izadiko ondareak.
Egia esan neronek ere
maitatzen ditut nereak
nahiz ta benetan zilegi zaigun
mimatzea norbereak.
Lehenik pertsonak maita ditzagun
eta gero abereak.

Lotura zuzena  |  Erantzun

 

Bertso berriak... Abenduari jarriak

Xebastian Lizasoren Argiako bertsoak | Erniarraitz |  2006/12/26  11:22

Hauek dira aste honetako Argiak dakartzan bertsoak, denok ezagutu eta kanta ditzazuen.

I

Ate joka ditugu
Eguberri jaiak
kaleetan argiak
ta opari gaiak
dirua xahutzeko
nolako garaiak
txiki egiten gaitu
gure handi nahiak.

II

Haurrak eskatu edo
norberak eskeini
auzokoak badauka
etxean komeni
«egoa» harrotuaz
ia edozeini.
Hori hainbeste bada
gutxiago ez ni.

III

Hilaren erdirako
hasiak kezkatzen
loteria zergatik
ez degu tentatzen
zuzen ote gabiltzan
zaila da asmatzen
«pobre ez jarraitzeko»
dirua gastatzen.

IV

Hilaren hogeita bi
nolako arreta
berdina gehiengoak
degun berriketa
sakela hutsik baina
ahoa beteta
konforme osasuna
badaukagu eta

V

Gabon gauez etxea
goxo ta epela
ez pentsa guzietan
gauza bera dela
norbait falta denean
askotan bezela
jakin goxoak ere
mikazten direla

VI

Hilak azkena omen
ta urteak berdin
ez digu utzi hainbat
poz eta atsegin
eta datorren hori
hobeago dadin
lehengo ametsak bete
ta berriak egin.

Xebastian Lizaso

Lotura zuzena  |  Erantzun

 

Bertso berriak... Gizapiztiari jarriak

Argiako bertsoak | Erniarraitz |  2006/12/12  18:35

Hara hemen Imanol Lazkanok aste honetako Argian jarri dituen bertsoak. Argia jaso ez duzuenok ere ikusi, ikasi eta kanta ditzazuen.

I

Aitaren hormonetan
sorturik hazia
amaren sabelera
hurrengo jauzia.
Milaka bizigairen
hil ala bizia
borrokan erabaki
genduen auzia.
Guda amaigabe hau
da handik hasia.

II

Hil edo bizi hori
izan zen orduan
suerte apurren bat
izango genduan.
Irabazle atera
ginaden guduan
«heroe» gixa aurkeztu
gintuzten munduan
borrokan jarraitzeko
eroen moduan.

III

Guda izan bagendun
barruko herentzi
kanpoan ez da izan
mila diferentzi.
Bakezko aire asko
ez dugu irentsi.
Dena norgehiagoka
dena konpetentzi
txikia ito eta
handia miretsi.

IV

Afrikan anemia
guk kolesterola
horregatikan dator
halako ujola.
Pateretan hil arren
ez dio axola
agian entresaka
egingo da hola
ta guretzat erraztu
hemengo kontrola.

V

Gu lasai bizitzeko
beste zenbat estu
milaka argazkitan
daiteke baieztu
ikusten dugu baina
zergatik sinestu?
Ongi datorkiguna
hobe ez saihestu.
Euro edo dolarrak
bihotzikan ez du.

VI

Hainbat tanke ta bonba
eta hainbat misil
ta ikusten ez diren
zenbat guda isil.
Indarra makurrago
ez laike erabil.
«Gizapiztia» bere
urratsetan dabil
guda etengabean
sortu, bizi eta hil.


Imanol Lazkano

Lotura zuzena  |  Erantzun