Gaia: Bertso

««Itzuli blog osora

“MINBIZIA DAUKADALA ESAN DIDATE”

Xabier Munibe Ikastolaren XVI. Bertso paper lehiaketa. | Erniarraitz |  2007/05/31  15:14

Azkoitian, 2007.5.31Xabier Munibe Ikastolaren XVI. Bertso paper lehiaketa. 1. saria  ( 14-16 urte bitartekoen artean )

 

ENERITZ ARZALLUZ

  “MINBIZIA DAUKADALA ESAN DIDATE”

 

1.-Berria entzun eta sortu zen nire sentipenen guda bukatzen ez den zulo iluna zetorren nire burura nola azaldu, nola onartu bukaeraren ardura barnean hainbeste duda tristea nere itxura egi gordina ezagutzeko nire garaia heldu da zein txikia den bizitzak eta heriotzak duten muga   2.-Jada helmugara iritsia naiz guztia daukat joana mundu honetan gelditzen zaidan denbora daukat emana hain hurbila dut datorrena eta hain urruna iragana baina etsipenaren zama ez da etorriko nigana sentitzen baitut egin beharra geroko utzi nuen dana beti esateko gogoa izan ta inoiz esan ez dudana.   3.-Nola azaldu ene laztana jada ez naizela biziko denbora luzez zure ondoan ez nauzula ikusiko baina hala ere maitatzeari ez diodala utziko sentipenei eutsiz tinko maitasuna ez da hilko azkeneko aldiz maite nauzula esan zaidazu mutiko nire ezpainetan irri batekin geratu nadin betiko   4.- Orain benetan ikus dezaket errealitate bortitza parean jartzen zaigun orori aurka eginez zabiltza dugunarekin ez konformatu gehiago lortzeko giltza dirua dugu baldintza negarra da gure hitza heriotza aurrez daukagunean konturatzea da hitsa irribar batek zenbateraino alai dezaken bizitza   5.-Zail da azaltzen ingurukoen babes zabal ta beroa nahiz ta beraien begiradetan tristura den oparoa aprobetxatu gelditzen dena eta onartu geroa zuena aurrera doa nirea da igaroa ez nago triste, barruan daukat sentimendu arraroa lortu ezin den zerbaitegatik borrokatzeko gogoa

ENERITZ ARZALLUZ

Lotura zuzena  |  Erantzun

 

Gu ta gutarrak

Bertso Aste | Erniarraitz |  2007/03/6  12:26

Erniarraitzen Bertso Aste 2007ren azken ekitaldiaren atarian gaude.

Lehen bi ekitaldiak, nola Azkoitiko Martitteko Bertso Afaria, hala Errezilgo Borondegiko “Bertso Txapelketa Azkarra” oso arrakastatsuak gertatu dira. Bietan ere jendez gainezka eta pozik atera zen jendea, bai bertsolariak eta bai entzuleak. Errezilen gainera sorpresa ederra  Eneritz Arzallus eta Eneritz Artetxe, bi neskak, eman zuten, lehenbizikoa garaile, bat behar-eta, baina saio eder askoak egin zituzten biek eta beste askok ere, hauekin batera aritu ziren Azpillaga anaiek esate baterako.  

Atarian dugun hirugarren ekintza Korrikaren Kultur Egitarauaren barruan txertaturik “Gu ta gutarrak” ditugu ostiral honetan, Azpeitiko Gaztetxean gaueko 22:30etatik aurrera. Espero dugu Azpeitiko Gaztetxea leporaino betetzea eta iluntze eder bat igarotzea. Orain arte egin duten ibilbidean dotore doa ikuskizun hau eta ez dugu Azpeitian gutxiago izaterik espero, guk jar dezagun gure aldetik ahal duguna, gero haiek emango dute beren onena-eta.

Hiru euroren truke ikuskizun merke eta bikaina, beraz, ostiral gau honetan Azpeitiko Gaztetxean. Biltzen den dirua Korrikarentzat.

Informazio gehiago helbide honetan: http://www.gutagutarrak.eu/

Lotura zuzena  |  Erantzun

 

'Mak' taldea finalera

Trintxerako saioa. Bertso Parranda | Erniarraitz |  2006/12/18  17:32

                                     

Azken finalerdia hirigunetik urrun, Errezilgo Trintxera jatetxean izan bazen ere, orain arteko saio guztien bidetik arrakastatsu eta jendez gainezka izan zen bada. NESKAK  eta MAK taldea ziren aurrez aurre. Saioa ona izan zen oro har eta momentu ederrak izan zituen tarteka. Zortziko txikian Minik eta Leirek egin zutena, esate baterako. 50na urteko senar-emazteak ziren, inoiz oporretara joan gabeak eta senarrak, Leireri tokatu zitzaion paper hori, Kubara bidaia egiteko proposamena egin zion, Mini emazteari. Saioko bertsorik politenetakoak bertan izan ziren. Emaztea hasi zen Kuba aldea gerria mugitzeko leku aproposa zela esanez eta hala erantzun zion senarrak:

Zerbait ba omen dago
hango eguzkian
berotzen dakiena
mugitzen hastian
ta gozatuko dezu
palmera azpian
gozatu ez dezuna
bizitza guztian.

 
Eta Miniren erantzuna ere polita izan zen

……
neska kubanita bat
bazaizu komeni
Diniokin ederki
ibiliko naiz ni.

Bakarkako lanetan ere bi hauen eskutik etorri ziren alerik politenak. Hitza gai emanda ‘malkoa’ izan zuen Leirek eta bere aurrean entzule zuen Maider Egiguren preso ohiari kantatu zion berarekin topo egiteak sortu zion zirrara, malkoa atera ziola adieraziz. Handik berehala zen Mini bakarkako lanean eta ‘irria’ hitza zuen kanturako gai. Maiderri kantatu zion honek ere, askatasunaren poza gogora ekarriz, eta honela amaitu zuen bertsoa:

……
zuen malkoa irri batekin
errez sendatu daiteke.

Ordurako ere behar bada egokiago ari ziren MAK taldekoak, baina puntutako lanean borobildu zuten beren lana. Errezilgo hiru bertsolari historiko izan ziren saioari begira eta dotore asmatu zuten, Miniren ‘Baserriren’ imintzio eta guzti, beren buruei eta ondokoei barre egiteko. Amaieran bertso gosez zegoen jendea baina baita aurkezlea ere zirikatzaile zebilen eta Leirek eta Minik saio polit bat egin zuten puntutan. Ondoren Gorka Tolosa bera, Mini eta Ander ere animatu ziren elkar zirikatzera.

Finalean dena den MAK taldeko kideetako bat faltako da, ‘Kurku’, kanpora joan behar baitu. Lekukoa ‘Xenpelar’ azpeitiar gazteari eman diote eta MAK  taldea MAX bihurtuko zaigu finalean.

Txapelaren jokoan, beraz, abenduaren 29an, Azpeitiko Gaztetxean, 23:00etan:

XAPIOS: Xabier Azpillaga, Jokin Sudupe 'Pio' eta Silvia Etxaniz

MA(K)X: Haritz Etxeberria 'Mini', Ander Urbieta, eta Josu 'Xenpelar' izango dira.

Lotura zuzena  |  Erantzun

 

‘Xapios’ taldea txapelaren bila

Etxe Aitzeko saioa. Bertso Parranda | Erniarraitz |  2006/12/4  11:18

                                        

Azkoitiko Etxe Aitz lepo beteta zela jokatu zen Bertso Parrandako lehen finalerdia. Azkoitiar kutsua zuen saioak eta ez Azkoitian zelako bakarrik, hiru azkoitiar gazte baitziren bertan kantatu beharrekoak, bi 'Xapios' taldean, Jokin “Pio” eta Silvia Etxaniz, eta Lide Rekondo 'Jolin' taldean bestea; eta Jokin Uranga, azpeitiarra bada ere, behin ere ukatzen ez duena bere amaren aldeko azkoitiar jatorria. Bertsotan ofiziotan Torriako Aterpetxean jarri zuten gaian ederki baliatu zuen bere jatorriak han zituela adierazteko.

Saio oso ederra eta orekatua egin zuten bi taldeek. Esan daiteke ofiziotako eta bakarkako lanak amaitu zituztenean ‘Jolin’ taldearen alde egongo zela balantza, baina puntutako lanak erabaki zuela ‘Xapios’ taldearen alde, aurrez irabazitako aldea galdu zuten bada lan horretan. Lide Rekondo bere urtebetetzeko oparirik gabe gelditu zen, puntu erdi  ziztrin batengatik.

Aipagarria da aurtengo honetan azaldu den gazte belaunaldiak erakutsi duen maila eta aurretik zebilen Jokin "Piok" egin duen hobekuntza. Esan behar da hiru hauez gain beste bi ere badabiltzala, Tibalt Alberdi, Mendizaleetan aurrekoan kantatu zuena eta ‘Neskak’ taldeko Eneritz Artetxe. Bost azkoitiar gazte, bada zerbait, baina Errezil ere ez da atzera gelditu, beste bi ordezkari baititu aurten, Eneritz Arzallus eta Nekane Zinkunegi. Azpeitiko mintegia dabil lehor xamar oraingoz, baina eman du ordezkari bat honek ere, Josu “Xenpelar”. Espero dezagun garai emankorragoen aurreko atsedenaldia izatea. Hor agertzen da bertso eskolak isilean egindako lanaren fruitua.

Zoriontzekoa berauek egin duten lana, duten zaletasuna eta, nola ez, hauei laguntzen, irakasten aritu diren bertsolari eta bertsozaleena. Bertso zaletasuna belaunaldiz belaunaldi igarotzeko biderik onena da hori, hauek baitira gazteagoen ispilu. Zorionak.

Aste hau berezi xamarra izaki, atseden hartuko du ostiral honetan Bertso Parrandak eta hilaren 15ean jokatuko da herri gunetik aparte oraingoan, Errezilgo Trintxeran. Txapelketari hasiera irabaziz eman zion ‘Neskak’ taldea eta ‘Mak’ taldea abiatuko dira Gaztetxerako txartelaren bila.  

 Beraz hurrengo saioa:

♦     Abenduak 15, TRINTXERA (ERREZIL): Gaueko 11:00etan

NESKAK:

·        Leire Ostolaza

·        Eneritz Arzallus

·        Eneritz Artetxe

MAK:

·        Haritz Etxeberria “Ministro”

·        Ander Urbieta

·        Eneko Ibarguren “Kurku”

 

AURKEZLEA: Gorka Tolosa

Lotura zuzena  |  Erantzun

 

Xebastian Lizasoren bertsoak

Bertso berriak... Onddoei jarriak | Erniarraitz |  2006/11/16  17:04

Hauek dira aste honetan Argian datozen bertsoak. Seguru badela azpeitiar bat baino gehiago lurralde haietan perretxikutan ibilia. Xebastianek esandako arrazoiekin bat ez datorrenik ere izango da norbait agian, nork daki. Aukera ederra du bertsoz erantzuteko.

Doinua: Pasaiako plazatik.

I
Ultzama aldetikan
dator arazoa
jasan ezina nunbait
jende erasoa
neurritikan kanpora
omen da jasoa
naturak emandako
opari gozoa.

II
Bilatuta onddoa
aguro saskira
kilo asko bilduak
gehiagon desira.
Onak dauden artean
hori komeni da
utzitakoak bertan
usteltzen baitira.

III
Buru argiren batek
egin omen plana
xox batzuek tarteko
konpontzen da dana.
Ordaindu beharko da
diru sari bana
lehen denentzako zen
naturak emana.

IV
Hesi ta aberetan
gaitza nabarmendu
hori «peajeakin»
ezinda zuzendu.
Nahiz ta lurrak emana
beretzako kendu
onddotara doanak
natura maite du.

V
Lotura klase asko
mendiakikoak
batzuek noizbehinka ta
asko betikoak
afizio ugari
daude modakoak
eskerrak asko dauden
ofiziokoak.

VI
Hizketan jakituna
edo ta ezjakin
gizakia arrotz da
natura gauzakin.
Ez da ezer konpontzen
lege berriakin
beraz, joka dezagun
gizalegeakin.

Xebastian Lizaso

Lotura zuzena  |  Erantzun

 

Albiste zaharragoak »»