Martxoak 8, Emakumeen Nazioarteko Eguna

Emakumeen Nazioarteko Eguna | Emakumeon hitza |  2009/03/4  09:33

Martxoaren 8a hurbiltzen ari den honetan, berriz ere kezkaz eta aldarrikapenez beterik gatoz. Zoritxarrez beste behin gure herrietako emakumeen egoeraz kezkaturik kalera atera beharrean gaude.

Emakumeak bigarren mailako hiritar izaten jarraitzen dugu 2009an eta eskubide mordoxka ditugu oraindik orain aitortzeke: soldata baxuagoak jasotzen jarraitzen dugu, erabaki postuetarako sarbidea malkarrez josia dago oraindik guretzat, jendarte eredu hierarkizatuak pareko harremanak izatea galarazten digu, ez dugu gure gorputzaren inguruko erabakiak libreki hartzeko aukerarik…

Sistema patriarkalak eta honen tresneria mugatzaileak antolatutako ereduaren araberako bizitza eramatera mugatuta gaude. Berdintasunaren diskurtsoaz bete dituzte aho eta paperak. Baina azken urteetan “aldaketa” eman dela esaten diguten arren, funtsean ezer gutxi aldatu dela agerikoa dugu oraindik. Instituzioek eta osasun zerbitzuek erabakitzen dute gure eskubide sexual eta erreproduktiboen inguruan, emakumeok libreki aukeratzeko espazio urriak utziz eta hau ikuspegi guztiz paternalista batetik. Honen adibide garbia dugu, azken 25 urteetan bezalaxe, abortua delitu izaten jarraitzea, eskubide bat izan behar duenean.

Azken urteetan eskubide honen aurkako erasoaldia jasaten ari gara sektore eskuindar eta kontserbadoreen aldetik: eliza katolikoa, aukeren kontrako taldeak (beren burua Provida deitutakoak), klinika abortisten kontrako operazio polizialak, 2000 emakume baino gehiagoren bizi pribatuaren kontrako eraso poliziala (azken urtetan abortua praktikatu duten emakume asko deklaratzera deituak izan ziren iaz). Gainera, Estatu espainolean PSOEren gobernuak legea aldatzeko proposamena aurkeztu zuen irailean, hauteskundeetan abortuaren gaia alboratu ondoren. Proposamen berria egiteko sortutako batzordeak bere lanak amaitu ditu, baina Mugimendu feministaren presentzia oso eskasa izan da bertan. Proposamen berri honen aurrean abortuak librea eta doakoa izan behar duela aldarrikatzen jarraitzen dugu.

Emakumeon eskubide sexual eta erreproduktiboak zapalduak egoten jarraitzen dute. Sistema mediko guztia gizonen arabera eta hauek dituzten beharretarako antolatuta dago, emakumearen beharrak behar espezifikotzat jotzen diren bitartean. Hauek, noski ama izateko aukerari soilik lotuta daude, euren ustez, desberdintzen gaituen faktore bakarra. Baina behar espezifikoei ere, emakumeetatik abiatu beharrean, sistemari komeni zaion eran erantzuten zaio. Esaterako, etzanda erditzen jarraitzen gara frogatua dagoenean eserita askoz osasungarriago dela ama eta haurrarentzat. Txerto prebentiboak jartzen dizkigute atentzio ginekologikoa hobetu beharrean, eta abar luze bat zerrendatzen jarrai genezake.

Noizko emakumea oinarri eta helburu izango duen Osasun Sistema bat? Emakumeok atera gaitezen kalera gure beharrak zein diren ozenki oihukatzera. Martxoak 8  honetan ere irten gaitezen denok batera jendarte parekide batean bizi arte ez dugula etsiko aldarrikatzera.

 

Lotura zuzena  |  Erantzun

 

Azpeitiko Danborradako talde guztietan irten dira emakumeak aurten

FESTAK | Emakumeon hitza |  2009/01/22  11:26

Urteetako borroka luzeen ondoren, 2009an lehenengo aldiz emakumeak irten dira Azpeitiko Danborradan parte hartzen duten talde guztietan. Jazoera honen balorazio oso positiboa egiteaz gain, Azpeitiko herritarrak eta elkarteetako kideak zoriondu nahi genituzke pausu hau emateko ausardia izateagatik.

Aldarrikapen eta kontzientziazio saiakera askoren ondoren datorren aldaketa hau, emakumeoi festetan era aktiboagoan parte hartzeko aukera ematen digun leiho ireki berri bat da. Horregatik, saiakera honetan aritu diren guztiak ere gogoan izan nahi ditugu, batez ere Izarraizpeko Sorginak Emakume Taldea. Jarrerak askoz itxiagoak zeuden garaietan ere borrokari tinko eutsi eta orain gauden egoerara iristeko egin duten ekarpena ordainezina da.Bide onetatik pausoak emanez jarraitu beharra dugu, hasi bakarrik egin gara, oraindik Azpeitian eta Euskal Herrian, jai parekideak izateko, asko bait dugu egiteko.

Bukatzeko, emakumeei dei egin nahi genieke, festa eta jaietan ez ezik biziko beste esparru guztietan ere beren eskubideak exijitu eta aldarrikatzen jarrai dezaten.

Azpeitian, 2009ko urtarrilaren 22an

Bilgune Feminista

Lotura zuzena  |  Erantzun bat. jone | 2009-01-22 | 12:41

 

Martxoaren 8a

Emakumeen Nazioarteko Eguna | Emakumeon hitza |  2008/03/3  16:38

2008KO MARTXOAREN 8A

EREDU PATRIARKAL HONEK ITOTZEN GAITU!!!

FEMINISMOTIK HARREMAN BERRIAK ERAIKI!

(Bilgune Feministaren irakurketa)

Euskal emakumeok gure etorkizun indibidual eta kolektiboa modu askean erabakitzeko eskubidea mugatua dugu. Batetik, gure herriko zatiketa administratiboak eta herri izaeraren ukazioak eta bestetik sistema patriarkalak ezarritako mugek, Euskal emakumeok egoera antidemokratiko batean bizitzera garamatzate.

Estatu frantsesean, Sarkozyren eskuinerako norabideak eta hemendik eratorri daitezkeen politika atzerakoiek zein estatu espainolean, indarrean dauden botere faktiko atzerakoi eta ultra kontserbadoreek emakumeon eskubideetan eragin zuzena dute. Aipagarriak lirateke, azken hilabeteetan egondako apezpikuen martxak, abortuak praktikatzen dituzten klinika pribatuen kriminalizazioa, hainbat emakume orain urtebete ustez abortatzeagatik deklaratzera deituak izana eta beste abar luze bat.

Familia eredu tradizional eta hegemonikoaren aldeko hautua garbia da. Jendartean, harreman eredu bakar eta nagusi bezala agertzen zaigu. Sexuen arteko botere harremanak emakumeon dependentzia emozional eta ekonomikoa bultzatzen duten eredua dira. Amatasuna derrigorrezko egiten duen eredua. Heterosexualitatea sexualitatea bizitzeko aukera bakar bezala erakusten digun eredua. Emakumeak rol tradizionalari erabat lotzeko egindako eredua. Egoera honen ondorioz, euskal emakumeok, gure gorputza, elkar bizitza harreman eta harreman afektiboen inguruko erabakiak hartzeko askatasun falta dugu. Ez dugu heziketa sexual integral bat bermatua. Ez dugu aborturako eskubiderik.

Euskal emakumeok gure alternatiba eraiki behar dugu  emakume eta gizonen artean harreman eredu berriak sortuz. Elkarbizitzarako harreman eta harreman afektibo anitz eta askeak izatea behar dugu, sexualitate hainbat aukera, parekidetasunean oinarritutako harremanak sortzeko bidean indarrak jarri behar ditugu. Gure eskubide sexualen aldeko lanean jarraitu behar dugu. Plazerrerako, harreman sexual askeak izateko, heziketa sexual integrala jasotzeko eskubidea dugu. Eskubide erreproduktiboak berma daitezen indarrak bildu behar ditugu. Gure gorputzaren gaineko erabakiak hartzeko askatasuna borrokatu behar dugu. Ama izan edo ez izan erabakitzeko eskubidea eta amatasun eredua libreki hautatzekoa. Abortua libreki eta dohain izateko eskubidea dugu.

Mugimendu feministari esker lortutako hainbat lorpen kolokan dauden honetan, eskubideen aldeko borroka aktibatzeko beharrean aurkitzen gara. Mugimendu feministaren aliantzatik abiatuta, Euskal herriko emakumeon eskubideen karta oinarri hartuta, gure eskubideen aldeko borrokan indarrak jarriko ditugu.

Ideologi eta praktika feministak bakarrik ekarriko dute euskal emakumeon askatasuna eta bide horretan, datorren apirilaren 12 eta 13an egingo diren IV. Jardunaldi feministetan parte hartzeko deia luzatzen dugu.

Euskal Herri feminista gure borrokaren bidez eraikiko dugu. GORA BORROKA FEMINISTA!

ASTE FEMINISTAKO EGITARAUA

• Martxoak 3tik 5era

Erakusketa: Emakume artistak. 17:30etik 19:30era Betharran Aretoan.

• Martxoak 4, asteartea

Zine Melita emakume kurduaren hitzaldia 20:00etan Sindikatu zaharrean.

'Gilaneh' filma 21:00etan Betharram Aretoan. Zineklubekoen eskutik.

• Martxoak 5, asteazkena

Emakume gazteen Batzarra. 20:00etan Gaztetxean.

• Martxoak 6, osteguna

'La soledad' filma. 21:00etan Betharram Aretoan. Zineklubekoen eskutik.

Ikastetxeetan Bideo emanaldia jolas denboran.

• Martxoak 7, ostirala

Ikasleen kontzentrazioa. 12:00etan barianteko rotondan.

• Martxoak 8, larunbata

Manifestazioa eta ekitaldia 19:30ean plazan.

III. Txotx feminista 21:00etan Berdura plazan.

'Botata' taldearen animazioa kaleetan zehar.

Lotura zuzena  |  Erantzun

 

Aste feministako egitaraua

EMAKUMEA | Emakumeen eskubideen gutuna |  2007/03/6  09:02

Martxoak 7 asteazkena: Euskal Herriko emakumeen eskubideen gutunaren aurkezpena. 20:30etan Sindikatu Zaharrean.

Martxoak 8 osteguna:
                            
            - Kontzentrazioa plazan. 19:30etan
            - 'Nueve vidas' filma zine klubak. 21:30etan Betharrameko aretoan.
            - Irakaskuntzan hitzaldia

Martxoak 9 ostirala: Autodefentsa ikastaroa gaztetxean. 18:00-20:00

Martxoak 10 larunabata:

            - Autodefentsa ikastaroa gaztetxean. 10:00-18:00
            - TXOTX FEMINISTA. 21:00etan Berdura plazan.
            - 'En tierra de hombres' filma zine klubak. 21:30etan Betharrameko aretoan

Martxoak 15 osteguna: Emakumeen batzarra. Emakumeen eskubideen gutunari ekarpenak jasotzea. 19:30etan Sindikatu Zaharrean.

Martxoak 17 larunbata: Eskubideen inguruko erakusketa plazan

Lotura zuzena  |  Erantzun

 

Euskal Herriko emakumeen eskubideen gutuna (V)

EMAKUMEA | Emakumeen eskubideen gutuna |  2007/03/6  09:01

GALDETEGIA

1.    GUTUNAREN SARRERAri DAGOKIONEZ

·    Beharrezkoa ikusten duzu Emakumeon Eskubideen Gutuna emakumeon egoera aldatzeko?
·    Oro har, sarreran aipatzen diren elementuekin bat egin duzu? Ezer soberan edo faltan dagoen uste duzu?
·    Zure egoera sarreran irudikatua ikusten duzu?



2.    GUTUNAREN BALORE FEMINISTEi DAGOKIENEZ
·    Eskubide gutun honen helburua beste jendarte bat osotzea da, non harremanak ez dira hierarkikoak izango eta beste baloreetan oinarrituak egongo dira. Gutun hau emakumeentzako askatasunean, berdintasunean eta  elkartasunean oinarrituko da, justizia eta bakea ondorio bezala izango zituenak.
·    Jendarte feminista eta pertsonen arteko harreman berrietan oinarrituriko herria eraikitzeko aipaturikoak funtsezko baloreak direla uste duzu?
·    Oro har, ezer soberan edo faltan dagola uste duzu?



3.    GUTUNAREN HERRITARTASUNAREN KONTZEPTUAri DAGOKIONEZ
·    Herritartasun kontzeptua, perspektiba feminista batetik berplanteatzea beharrezkoa iruditzen zaizu?
·    Oro har, ezer soberan edo faltan dagoela uste duzu?



4.    GUTUNAREN ESKUBIDEEN ZERRENDAri DAGOKIONEZ
·    Eskubide hauek aitortuz eta bermatuz gero, jendarte feminista eta pertsonen arteko harreman berrietan oinarrituriko herriaren aldeko helburua lortuko genuke?
·    Aitortzen diren eskubideekin bat egiten duzu?
·    Zure egunerokotasunean urratuak dituzun eskubideak barneraturik daude?
·    Oro har, ezer soberan edo faltan dagoela uste duzu?

Lotura zuzena  |  Erantzun

 

Albiste zaharragoak »»