Gaia: MENDIA

««Itzuli blog osora

Helduen ibilaldi neurtua

MENDIA | uztarria.com |  2007/06/13  13:48

XVIII. aldiz Lagun Onak mendi bazkunak antolatu zuen ibilaldi neurtua joan den Igandean, bi urtez behin, Azkoitiko Zazpi Gurutze ibilaldiarekin txandakatuz ospatu ohi dena.  

Larunbat iluntzean eta hasi aurreko ordu erdian ekaitzak gogor jo zuen inguruan eta horrek hainbat lagun atzeratu zuen. Atera zirenek ez zuten damurik izan ordea, Urrakitik aurrera giro bikainarekin egin baitzuten ibilaldia. Ibilbidearen edertasunak eta antolaketan egin zen lan ugariak partaideen zeharkaldi gogorra erraztu zuen. Urraki, Ernio, Gazume, Erlo eta Xoxote  izan ziren tontorrak, 45 kilometroko bidaian.

Xoxoteko aterpetik pasa eta mendi taldearen elkartean bukatu zen ibilaldia, amaieran partaideen esker onik ez zen falta izan. Hemendik bi urtera egingo den ibilaldi neurturako proposamen eta aholkuak jasoak gelditu dira. Egun horretan atzera egin zutenei aukera ematearren, mendi taldeak bere web orrian  eskegiko du ibilbidea GPS bidez egin ahal izateko.

Datorren urtean Azkoitiko Anaitasuna mendi taldeak hartuko du txanda Zazpi Kurutze ibilaldi neurtuarekin.

Mendi taldeak  “eskerrik beroena eman nahi die laguntzaile izan diren Azpeitiko udalari, DYAri, Azkune frutategiari, Super BMri, Eroskiri eta antolaketan  parte hartu duten herritar guztiei”.

Lotura zuzena  |  Erantzun

 

Lagun Onaketik mendizaleentzat hainbat ohar

MENDIA | uztarria.com |  2007/02/14  11:45

Lagun Onak Mendi Bazkunak hainbat ohar helarazi nahi izan ditu. Hasteko, elkarteko bazkideei jakinarazi nahi die 2007ko federatu txartelak prest dituztela eta elkarteko tabernan jaso beharko dituztela. Bestetik, Euskal Mendi Federazioko lizentzia tramitazioa EHNA-ko datuekin egin daitekeela adierazi dute. Azkenik, Mendiko Kirol Teknikari titulua atera nahi duenarentzako Lagun Onak Mendi Bazkunaren elkartean informazioa eskuragarri izango dela.

Lotura zuzena  |  Erantzun

 

Lagun Onakekoak Izazpin

MENDIA | uztarria.com |  2007/02/6  09:43

Joan den igandean abiatu ziren 16 lagun Izazpi aldera. Lagun Onak Mendi Bazkunak antolatutako mendi ibilaldian “paisaje ederrez” gozatu zutela azaldu du Josu Agirre Lagun Onakeko batzordekideak.



Enparantza nagusitik abiatu ziren. Oñatzetik aurrera egin zuten, gero; Igarate aurretik paseaz, Pagotxetako lepora iritsi ziren. Pagotxetatik igo ziren Izazpi tontorrera.



“Bidea giro ederrean egin genuen; oso eguraldi politarekin. Lokatza pixka bat bazegoen bidean, eta Pagotxetatik gora elurra dezente” azaldu du Izagirrek.



Behin gaina eginda, Largarate aldean behera, Loreto mendi azpitik paseaz Urrestillara jaitsi ziren eta hortik Azpeitira.   

Lotura zuzena  |  Erantzun