Gaia: Festak

««Itzuli blog osora

Aurten ere, gauza bera

Festak | Begoña Elias |  2006/07/19  18:32

Atzo jaso nuen aurtengo festen programa. Han neukan, “ felpudo ” gainean utzita, pentsa zenbaterainoko interesa edukiko nuen, gaur bazkalondora arte ez dut ireki sobrea.

Hasteko, programaren azaleko argazkiak Franco gogorazi dit, baina ez, gero akordatu naiz, gure patroiaren heriotzaren 450. urteurrena betetzen dugula.

Programaren edukia, orain dela 30 urtekoen  berdina, erdaraz esaten den bezala, <más de los mismo>, urteak pasa arren hemen dena berdin jarraitzen du, ez dakit, agian izango da Udalean beti jende berdina dagoelako?

Oso ondo, Jon Agirrek programari buruz idatzi duena, erabat ados nago. Egia esan, neu ere harritu egin nau alkatearen agurrak, sinatu gabe egon bazen, jesuita baten diskurtsoa zela pentsatuko nuen.

Programaren edukiarekin jarraituz, umeen euskal festa eta baserritarren eguna kenduta, euskal kutsu gutxi ikusten dut beste egunetan.

Nik faltan botatzen dut “ euskal festa “ egun bat. Oraindik gogoan daukat, frankismo garaian Azpeitian antolatu zen hura, jende guztia baserritar jantzita, egun guztian zehar erromeria herriko txoko guztietan, herritar asko ibili ginen lanean, partehartze ikaragarria izan zen, eta oker ez banago “Oargik” hartu zuen antolamenduaren ardura.

Eta egun hura gogorazi zidan, lehengo astean Errenterian ospatu zuten, erromeri egunak, egunkarian zetorren argazkian ederki ikusten ziren, zahar, gazte eta haur, denak elkarrekin dantzan edo saltaka.

Baina, “Azpeitia is different“, hemen gauza guztiak goitik behera antolatzen dira, hori bai, urtero ateratzen dute deialdi bat, festen antolakuntzan parte hartzeko eta herritarren partehartzea eskatuz.

Balio al du ezertarako?, iruditzen zaizue “aurretik“ dena lotuta eta antolatuta daukaten programa bat aldatzeko gai direla?, nire ustez, deialdi hori marketing hutsa da.

Aurten ere, zer esana emango dugu bazter guztietan, hasi Bilbotik eta Donostiara bitarteko denak harrituta utziko ditugu gure programaren luxuarekin. Gustura jakingo nuke zenbat diru kostatzen zaigun Azpeitiarroi, begi-bistakoa da batzuentzat negozioa bihurtu dela.

Bukatzeko, alkateak bere agurrean aipatu ez dituenak aipatu nahi nituzke. Aurten ere herritik urrun zaudeten, Txapi, Jabi, Xegu, Paterra, Gotzon, Mª Angeles, Iker, Pakea eta Etxarte, ziur egon, txupinazoko momentu horretan herritar askoren bihotzean izango zaretela.

ONDO PASA SANINAZIYUEK!!!

Lotura zuzena  |  35 erantzun. Azkena: Begoña Elías | 2006-07-22 | 12:28