Basazabal Etxea

Zertarako? | Begoña Elias |  2006/03/2  14:50

Azpeitian badugu eraikin zoragarri bat, Basazabal, inolako etekinik atera ez zaiona. Urte asko dira fatxada birgaitu zutela, barrua, oraindik bukatu gabe omen dago.

Sinestezina da, 1026 metro karratuko eraikin bat etekinik atera gabe edukitzea, are gehiago, herrian hainbat ekitaldi egiteko ditugun zailtasunak ikusita.

Lehen, Antxieta etxea geneukan era guztietako erakustaldiak egiteko, baina, hau itxi zutenetik, Betharrametako aretoan moldatu behar izaten dute, eta egia esan, ez da berdina.

Niri behintzat ez zait berdina egiten, argazki edo koadro bat, inprobisatutako txapazko  horma batean ikustea, iluminazio desegokia, eta ez hori bakarrik, aretoa bera ere, mila aldiz birziklatutako lekua ez da horretarako aproposa. Ikusi besterik ez dago, egun batean eliza bihurtzen da, aitorleku eta guzti, beste batzutan, eskolako umeentzako eszenatoki, eta orain Soreasu itxi zutenetik, bertsozaleentzako agertoki.

Beste lekurik edukiko ez bagenuke, tira!, baina herri barruan dugun Basazabal eraikina eduki eta horrela ibiltzea, ez da normala.

Etxe hau zaharberritzen gastatu dituzten diru guztiak alferrik dira gero etxe horrek itxirik egon behar badu. Oraindik bukatu gabe dagola?, bere garaian lortu ziren diru laguntzak horretarako izan behar lukete. Bukatu dezagun behingoz eta atera diezaiogun benetako etekina, eta lau solairu dituenez, ederki aprobetxatuko lukete herrian dauden kultur taldeek.

Azkenean, egia izango da, gure Udalak itxurakeri asko duela. Proiektu erraldoiak planifikatzen ditu, Soreasukoa adibidez, herriko beharrei erantzuteko omen da, baina, jasotako hainbat proposamen baztertu ditu, ez ditu aintzakotzat hartu ere, 14 taldeen babesa zuen Uztarriaren Kafe Antzokiko proposamena. Aldaketak ezin direla “ hilero “egin aitzakiarekin, “ beraien “ proiektua aurkeztu dute.

Egia esan, ez nuen esperantza handirik Kafe Antzokiko proiektuak aurrera irtengo zuenik, Udalak beti horrela funtzionatu duelako, eta gehiengo osoa daukaten bitartean nahi dutena egiten jarraituko dute.

(Botereari, intxaurrondoari bezala gertatzen zaio, bere itzalpean ez du ezer hazten uzten)