Azpeitiko Areto Futbol Taldea K.E.-ko talde nagusiak garaipen bikaina lortu zuen joan den larunbatean (hilak 16). Iņaki Unanuerenek mendean hartu zuten egungo liderra, Solasten Lazkao, kiroldegian. Partida benetan gogorra izan zen baina Jose Mari (3) eta Joxemiren golak (1) nahikoak suertatu ziren goierritarrei gailentzeko. Garaipen honen ostean, Jostaldi play-off postuetatik garaipen bakar batera jarri dira. Gainera, datorren asteburuan atzeratutako norgehiagoka jokatuko du Tolosan. Aukera ezinhobea, beraz, postu pribilegiatu horietara salto egiteko.

Azpeitiko Areto Futbol Taldea Kirol Elkarteko bi taldeek datorren irailaren 30ean hasiko dute liga. Aurredenboraldia joan den abuztuaren 28an hasi zuten arren, bi taldeek larunbatean jokatu zituzten euren lehenengo adizkidantzazko partidak. Arerio gogorrak izan zituzten biek. Lehendabizi, Jostaldi B-ko gazteak Elgoibarko Kenciren bigarren taldearen aurka lehiatu ziren. Elgoibartarrak Jostaldi A-ren mailan izango dira aurten eta 1-2 gailendu zitzaien maila bat beherago (Hirugarren Mailan) egongo diren azpeitiar gazteei. Seniorrei oraindik eta maila goragoko taldea egokitu zitzaien, Kenciren talde nagusia, aurten Estatu mailako Nazional B deritzon ligatik jaitsi berri dena (Jostaldi A-rena baino hiru maila goragokoa). Iņaki Unanuerenek aurpegia eman zuten, halere, azkenean 3 eta 4ko emaitzaz galdu zuten. Bai gazteek zein seniorrek, halere, asko hobetu beharko dute euren jokoa Realaren eta Athleticen modura liga hasi nahi ez badute behintzat. Izan ongi.

Horixe bera da Azpeitiko Areto Futbol Taldea Kirol Elkarteak aurredenboraldia hasteko aukeratu duen eguna. Astelehena, bai, abuztuko azkena, sekulako astelehena izango da askorentzat, dudarik gabe. Ekainean eta uztailean egindako entrenamendu irekiek behintzat interesa piztu dute herriko zein Azkoitiko gazte batzuren artean. Hauek aurredenboraldian agertuko balira seinale ona izango litzateke, talde filialak zenbait jokalari berri fitxatu beharrean aurkitzen baita. Izan ere, iazko bi jokalari onenek talde seniorrean jokatuko baitute irailaren 30an hasiko den 2006-2007 denboraldian. Esan bezala, datorren abuztuaren 28an hasiko dira entrenamenduak bi taldeentzat (Urola ikastolako kadete taldea urtarriletik aurrera hartuko du klubak berriro ere eta jubenil taldearen sorrera abian da). Lehenengo bi asteetan, astelehenetik ostegunera, lan fisikoa soilik egingo dute jokalariek. Ondorengo asteetan, berriz, estrategia eta bestelakoak landuko dituzte, adizkidantzazko partidu pare bat eta guzti.

Ordura arte, beraz, ondo segi, eta ondo pasatu oporrak. Gora Azpeitiko Areto Futbola.

Gure Kirol Elkarteko gazteek aukera ezinhobea dute bihar denboraldiari amaiera bikaina emateko. Jostaldi Kirolak B taldeak gogoz eman zion hasiera urteari urria aldean, partidak irabaziz, joko ona eginez...2006. urtea hastearekin batera, gauzak zerbait okertu ziren, baina taldeak sailkapenaren goikaldean jarraitu zuen. Azken jardunaldian (orain dela 2 aste) hil ala biziko norgehiagoka jokatu zuten gazteek Aretxabaletan. Berdinketa nahikoa zen play-off-ak ziurtatzeko. Hala ere, Jostaldi garaile itzuli zen etxera (1-9). Hor ere ez zen hutsik egin. Oro har, Jostaldi B taldearen denboraldia txalotzeko modukoa izan da, azpeitiar zein azkoitiar gazteez osatutako talde honek bere lehenengo partehartzea baitu Gipuzkoako liga federatuan. Kirol Elkarteko agintarien esanetan, lehenengo urte honetako helburua ez zen mailaz igotzea, taldea asentatzea baizik. Bihar, halere, gazteek mailaz igotzeko aukera emango liekeen partida jokatuko dute kiroldegian. Zuekin gaude. Animo gazteak!

Jostaldi B-ko gazteek ez zuten hutsik egin Aretxabaletan eta hurrengo asteburuan (maiatzak 13 eta 14) Azpeitiko Areto Futbol Taldea Kirol Elkarteari esker (eta udal, kirol patronatu eta gipuzkoako federakuntzaren agintarien laguntzarekin) herrian ospatuko den 3. A Mailarako play-off-etan izango dira. Uste baino errazagoa suertatu zen talde filialak U.D.A.-ren aurkako jokatu beharreko partida. Galtzen hasi arren, gazteek goitik behera kontrolatu zuten lehia. Berdinketa nahikoa zen play-off-etako helburua lortzeko. Hala ere, irabaztearekin bakarrik konformatu ez eta gol zakukada galanta ekarri zuten gazteek Azpeitira (1-9). Azkenengo minutura arte ez zioten atsedenaldirik eman aurkariari. Behingoz bada ere, seniorrek badute zer ikasi gazteengandik. Izan ere, Jostaldiko talde nagusiari ihes egin zion garaipenak beste behin ere azken minutuan (2-2). Motibazio falta agian. Areto futboleko liga federatuetan hainbeste norgehiagoka (27tik, 13) berdindu duenik ba al da?