Teologia ikasketak

Berriz ere hain ezaguna zuen Oñara itzuli zen Patxi. Baina, 31 urte zituela, Filologia Klasikoan lizentziatuta, euskara alde guztietatik zeriola eta Oñako beste alderdian, Teologoen alderdian, bizi eta ikasteko gogo biziz.

Salamancako unibertsitario bizitza utzi eta berriro Oñako etxearen harresien artean bizitzea, aldaketa handi samarra zen. Dena dela, Teologiako ikasleek gainerakoek baino askatasun handiagoa zuten, eta apaizteko zuen gogo hark ere eramangarria egin zion Oñako itxitura hura.

Hala ere, bolada latz samarra igaro zuen Teologiako lehen urte hartan; bokazioa zalantzan jartzeko adinakoa, hain zuzen. “Zalantzak zirela-eta Oñako aita Espiritualagana joan nintzen hitz egitera. Nire ezinegona adierazi nion, eta agian Lagundia uzteko tentaldia. Aita Espiritualak, besterik gabe: ‘Si, salga usted’, esan zidan. Erantzuna ez zitzaidan, ordea, batere gustatu; ez baitzidan erantzuna arrazoitu eta hari kontra egiteagatik bakarrik ez nintzen atera. Gerora bolada txar hura gainditu ahal izan nuen”.

Teologoen bizimodua filosofoenaren tankerakoa zen, egunean zehar zituzten eginkizunak berdintsuak ziren, baina ikasketak zituzten ezberdin. Fi-losofiako gaien ordez, Teologiakoak.

Teologiako liburuez gain, esku artean eta buruan zerabiltzan Patxik euskal liburuak ere. Izan ere, Salamancako ikasketak ezinbestekoak izan ziren Patxik euskal munduarekin zuen harremana sendotzeko. Beraz, urte horietan Teologian murgilduta egon arren, makina bat ordu eskaini zizkion euskararen azterketari.