Postmodernoak gara

Mikel Ayerbe

Postmodernoak gara

Posteritateari bizkarra ematen ari garelako
Postergatuta
Post-mortem jaio ginelako.

Post-it belaunaldikoak gaituzue:
kopetan paper horiak itsasten ditugu
gure helburuak zein diren ez ahazteko;
bularrean, bihotzaren gainean,
mezu horiak iltzatzen ditugu
oraindik nor maite dugun gogoratzeko.

Postmodernoak gara, bai:
efimeroaren lilurak begiak irekiarazi dizkigu
eta ikusitako guztia ulertu nahian
itsutu egin gara.

Itsutu egin gara
eta ez ditugu paper horiak
buru-bihotzetatik
erortzen ikusi…

Baina Postmodernoak izango gara
eta bizitza hitz bat dela sinesten jarraituko dugu,
Post-it batean idatzi daitekeen poema bat.