Menturari

Rikardo Salegi

Begiak ase ezin honek nazkatu nain;
Nazkatu gela ilunetako izerdiak.
Dena lerde-jarioa dela ukatzeak, eta...
Putak zaretela aitortu beharrak eta...

Nazkatu nain.

Ez dinadanez jada sinesten, norbait egin nindinan hartan,
Baina handik edaten jarraitzen baitinat,
Hiri errendatzen natzain, mentura.

Hiri bai, mentura, halabeharra, zoria: haizena haizela.

Ttipi-ttapa galdu honek,
Harrabots zekenak,
Hezetasunean egarri egote honek
Lurmena behar din, mentura.

Eta hiri gatibatzen natzain.

Taupada eman zitenan hark utzi nain-eta,
Ezkatazko igurtzien preso,
Bihotz lehortuak promesten,
Bizirik sentitu nahi dinadan bakoitzean.

Horrexegatik, hiri makurtzen natzain, mentura.
Beste inori eska ezin diodanaz puztu nazanan,
Hartan sinistuko ez dinadan arren,
Gutxienez zerbait senti dezadan.