Orri arteko iraultzak

Itziar Aldalur

Orri artean gorderik diraute
iraultzek
hilotzek
odolez idatziriko garaipenek
hondamendiek

Inoiz izan ote ziren lurraldeetatik
erbesteratutako izanak

Ezjakintasunez zorroztutako haiztoak
zain dagoen maitasunik babesten ez duten
burdinezko ezkutuak

Erdi Aroa
mende erdia
herri osoa
erdi osoa

Mugaezinak ziren gudak
gudaz borrokatzen ziren mugak

Atzo, gaur, bihar
bada gudarik gabeko iraultzarik
iraultzarik gabeko gudarik