Giltzaturik ditugu

Arantxa Aldalur

Pribatua (guztiok sentitzen ditugu burdinezko taupadak gure hoteleko azken gelan)

Giltzaturik ditugu

muskerren lorratza

noraezean dabiltzan erlojuak eta

kalekantoietan inoiz galdu genituen poemak.

Gela honetan,

eternitatea alkoholetan dosifikatzen da

lau hormen testigutzak

inoiz inon traizionatuko gaituelakoan.

Bakardadea.

Metalezko hodietatik bonbeatzen dira egunak

odola bailiran

lokatzetan estaltzen gara

bihar argituko duenaren zain.

Eta bihotz arrotzak formoletan gordeko ditugu

gorri

bizirik baleude bezala

apal haustuak betetzeko,

ezkutuan eta ilun

neoizko argiak ez baitira jada iristen honaino.