56. gelatik poema bat

Xabi Borda

Lehiotik begiratu dut

errotulo giganteek eta farolek

zeru ikaztua nola pizten duten ikusteko.

Trafiko hotsak etxean nagoela diosta.

Baina ez nago.

Ez dira betiko ezezagunak kaleotan dabiltzanak.

Hemen nahi zintuzket

zu edo sagar erreak bestela

izarek zerbaiten usaina har dezaten.

Badakit aspaldian hegazkinak greban direla

eta ontziei itsasoak lehortu zaizkiela.

Ez dela zure errua nirea ez dela

eta denbora ihesi doala.

Ez nuke hemen anonimo hil nahi.

Beldurra diot bakarrik itotzeari.

Nik maite zaitut.

Baina ez beti.

Ulertuko duzu irautera egin behar dudala.

Bilatu nahi banauzu esango dizut non nagoen

emango diot su hotelari.