Azpeitiko efemerideak

Otsailaren 9a

• 2005. Espainiako Polizia Iker Iparragirre gaztea atxilotzen saiatu zen, baina honek ihes egin zuen.
• 2003. Euskadiko XXXIX. Kross Txapelketa korritu zen Goenagako zelaian.
• 1988. Urola trenari buruz Eusko Gobernuak hartutako erabakia atzera bota zuten Urolaldeko alkateek.
• 1985. Osasun Zentroa inauguratu eta lehen zerbitzuak eskaintzen hasi zen.
• 1942. Matxinbenta auzoan jaio zen Alejandro Oiarzabal Zubiaurre. Frantziskotar ikasketak Arantzazun, Oliten eta abar egin ondoren, Jakin, Egan, Goiz-Argi eta Zeruko Argian idatzi zuen.
• 1925. Alkateak, eskolara joaten ez ziren umeen gurasoei ezarritako isunen berri jakinarazi zuen, 148 pezetan jarriz isuna. Ondoren, diru hori eskola nazionaletako umeen artean sariak banatzeko erabiliko zela erabaki zen.
• 1820. Azkoitian zegoen korrejidoreak idatzitako gutuna irakurri zen. Bertan, Azpeitiko Udalak, bezperan egindako batzarrean, Inauterietan zekorketak egiteko enparantza Nagusia ixtea erabaki zuela bide zuzenetik jakin zuela zioen korrejidoreak. Eta herritarren dirua horrela gastatzea ezinezkoa zela adierazten zuen, eta, azken batean, azpeitiarren ideia aurrera eramatea debekatzen zuen. Agintariei korrejidoreak Gipuzkoako herrietan horrelako debekuak jartzeko ahalmenik ez zuela iruditu zitzaien, eta gutunaren kopia Probintziari bidaltzea erabaki zuten, nola erantzun jakiteko.
• 1779. San Agustin eta Santo Domingo komentuei, Inazio deunaren egun bezperan eta beste zenbait egunetan leihoetan argiak piztera derrigortuak zirela gogoraztea erabaki zen. Eta hori egiten ez zuten bitartean herriak ez zietela sukalderako egurrik emango eta ez zituztela herritarrak zituzten eskubideak izango.
• 1750. Apezpikuak parrokiko erretaula nagusiaren alde batean Arimen aldarea egitea baimendu zuen.
• 1718. Nahastu gabeko sagardoak saltzeko denbora jarri zen: upelean zen edaria egiteko behar izan ziren kuebano izeneko neurria hainbat eta beste lau egun gehiago.
• 1676. Garizumako lehen iganderako deialdia egitea erabaki zen. 18 urtetik 60 urte bitarteko herritar eta biztanle guztiak deitu ziren, arratsaldez, enparantza Nagusira armak zituztela, orduan denak bat eginda neurriak hartzeko armak erabiltzeko ariketak egiteko. Bide batez, lau barrika bolbora eta behar zen metxa erostea onartu zen.
• 1658. Urrestillako parrokiko etxezaina zen Inazio Gaztañaondok bere izenean eta bertako biztanleen izenean, Azpeitiko alkatearen jokaera salatu zuen, honek etxezaintzarako aukeraketa egin behar zeneko bileran egon nahi zuelako. Ozaeta Gallastegi eskribauaren aurrean egin zuen bere kexaren aurkezpena, esanez Azpeitiko alkateak horrelako aukeraketa egin behar zenean ez zuela zerikusirik, eta ondoren, kopia bat alkateari ematea eskatu zuen.
• 1629. Herrian ospatuko ziren Gipuzkoako Batzar Nagusietarako elizkizunen akordioa egin zuten erretoreak eta herriak.
• 1594. Santo Domingo komentuko fraideek pulpitutik agintariez gaizki hitz egin zutenaren zurrumurruak entzutean, neurriak hartzeko gertatutakoaren berri jakitea erabaki zen. Eta Iruñeko apezpikuari herria monastegia eraikitzearen aurka dagoela adieraztea erabaki zen.
• 1559. Gauero erronda egitea eskatu zitzaien udaltzainei. Eta eskolan jarraitzen zuten gazteei eta ikasleei armak kendu zitzaizkien, baita kartzelaratu ere.
• 1559. Nikolas Saez Elolaren ondoretasunari buruz Frantziskanekin zuen auzia alde batera uztea erabaki zuen herriak.