Azpeitiko efemerideak

Urtarrilaren 2a

• 2008. EAJko Azpeitiko buru batzarreko presidente Alex Etxeberriaren autoari eraso egin zieten
• 1911. Herriaren hirugarren urontzia egiteko lanak adjudikatu ziren.
• 1907. Santo Domingo komentua izandakoaren patioan ziren torilak edo zezentokiak botatzea erabaki zuten agintariek.
• 1893. Sebastian donean eta Inauterietan kaleratuko ziren sokamuturrerako zezenak inguratzea eskatu zitzaion Tomas Larrañagari.
• 1882. Madalena ermitaren kanpoko harresia ahalik eta azkarren jartzea eskatu zitzaion Joxe Inazio Aizpuru erregidoreari.
• 1814. Herriko diruzaina zen Frantzisko Jauregik dimititu egin zuen.
• 1735. Loiolako elizaren laranja erdiari heltzeko burdin arkuak jartzea erabaki zen, mugimenduren bat izan zuela ikusi ondoren.
• 1711. Parrokirako egin ziren konfesionario edo aitorleku berriak ikusteko, Martin Zaldua maisua izendatu zen.
• 1710. Sagardoa saltzen jarri aurretik eta txandak izendatzeko egin ohi zen zozketarako, 48 upelen berri eman zen; guztiak sagardo garbia zutenak ziren, eta beste zortzi upel urarekin nahastuta zeudenak .
• 1699. Parrokiko korurako eskailera egiteko Lazaro Laincera maisuarekin eginiko hitzarmenaren berri eman zen.
• 1685. Ikusirik Nikolas Saez Elolak sortutako memoriari erantzuteko kaperau bat behar zela, lortu nahi zutenek eskaerak egin zitzaten, herritarrei jakinaraztea erabaki zen.
• 1656. Eskritura baten bidez eta 228 dukat ordainduz, Enparango errota Frantzisko Arbeztainek hartu zuen urte baterako.
• 1642. Juan Oñazek saltzen zituen txakolinak ikustea erabaki zuten agintariek. Inguruko herrietan merkeagoak eta hobeak saltzen zirelako eta, gainera, bertan eginak. Udalak saltzaileekin urte osorako tratua egin zuen.
• 1600. Miguel Saez Goiazek, udalaren ordezkari bezala Gortean denboraldi bat egin ondoren, San Agustin monastegia sortzeko baimena herriratu zuen.
• 1582. Parrokiko aldare nagusiaren inguruan Joan Apoitak eginiko lanak aztertzea erabaki zen. Zurgin langintzak ikusteko, Martin Madariaga aukeratu zen.
• 1561. Herriaren lurraldeetan, 10.000 gaztainondo ziren orduan, eta Pedro Ugartek beste 6.000 landare sartzeko tratua egina zuen. Esaten zenez, ordea, haritzak falta ziren .