Igandean ETAk Erlon burututako ekintzaren harira, Udal Gobernuak "kezka" adierazi du

POLITIKA | uztarria.com |  2008/04/1  11:47

Konponbidea eta bakea lortzeko alderdien arteko mahaia "inoiz baino beharrezkoagoa" dela uste dute gobernuko kideek

Joan den igandean ETAk Erloko telebista hedagailuaren kontra burututako ekintzaren harira, Udal Gobernuak "kezka" adierazi du hedabideei igorritako komunikatuaren bidez. Hain zuzen, EAE-ANVko kidea da Azpeitiko alkatea —Iñaki Errazkin—; EAk, Aralarrek eta hirurek osatzen dute udal gobernua. Horien ustez, gatazka politikoari konponbidea bilatzeko "ezinbestekoa da alde guztien arteko elkarrizketa" eta horretarako "konpromisoa" azaldu dute.

"Ildo beretik, konponbidea eta bakearen bidean alderdien arteko mahaia momentu hauetan inoiz baino beharrezkoagoa ikusten dugu" diote. Horren aurrean, alderdi eta eragile sozial eta sindikalei dei egin diete elkarrizketaren bidez konponbidea eta bakea lortzeko "ahaleginak biderkatu" ditzaten.

Udal Gobernuaren arabera, "guztion arteko elkarrizketak ahalbideratuko duen akordio politikoa da giltza, eta akordio politiko horrek herritarren borondatean oinarritua behar du izan". Edozein proiektu politikoren "inposaketa" baztertuz, "Euskal Herriak hitza eta erabakia" izan behar dituela azaldu dute.

"Horrelako gertakaririk gehiago jazo ez dadin, dagokien eremutik", lanean jarraituko dutela adierazi dute, "bake justu eta iraunkor baten bila".

ERANTZUNAK

1.  Igor - 2008-04-01 | 15:46 Kezka? akordio politikoa da giltza? Ados ez dagoenaren aurka bonba ipintzea ez al da "proiektu politikoa inpostu nahi izatez?". "Horrelako gertakaririk gehiago jazo ez dadin" ETAri peajea ordaindu behar al zaio ba? Zer gertatzen da EA eta Aralarrekin?

Erantzuteko izena eman behar duzu Erabiltzaile-izena Pasahitza »» Pasahitza ahaztu zait »» Lehenengo aldia da eta alta eman nahi dut