Azpeitiko aldaketaz

IRITZIA | Iban Arregi |  2007/06/19  11:45

Azpeitian zapatuan gertatutako aldaketa sorpresa izan da, baina zilegia eta demokratikoa ez denik ezin da esan. Zilegia ez ezik, esanguratsua ere bada EAE-ANVk, EAk eta Aralarrek bat egin izana EAJri alkatetza kentzeko

Nafarroan legala ez ezik zilegia eta demokratikoa dena, zergatik ez Azpeitian? Nafarroan UPN boteretik kentzea zilegia eta demokratikoa bada, zergatik ez Azpeitian EAJ boteretik kentzea? Demokraziaren arauek aukera ematen dute zapatuan Azpeitian gertatu zena gertatzeko, eta hori erabat zilegia da. EAJk berak askotan egin izan du eta egingo du; Nafarroako Gobernuan saiatuko da egunotan, adibidez; edota Gipuzkoako Diputazioan. Bestelakoa da kolpe gogorra izan dela EAJrentzat, bestelakoa da horrek EAJren eta EAren arteko harremanak non uzten dituen, euren artean bozkatuena errespetatzeko itunik bazuten ala ez, EAko zuzendaritzaren eta herrietako errealitatearen artean suma daitezkeen desberdintasunak...; baina zilegia eta demokratikoa ez denik ezin esango du zentzuduna den inork.

Eta zilegia ez ezik, esanguratsua ere bada Azpeitian (eta Zumaian, eta Bizkaiko hainbat herritan...) EAJ boteretik kentzeko bat egin izana EAE-ANVk, EAk eta Aralarrek. Zerbaiten seinale bada hori: Nafarroan bezala, eta alderdietako goi organoen iritziaren kontra, aldaketaren beharra ikusi dute Azpeitiko bederatzi zinegotzi horiek, eta botoak batu egin dituzte, modu erabat demokratikoan. Gainera, Azpeitian aldaketa nahi hori aspalditik sumatzen zen (gogoratu 1995eko saio hura, gogoratu 1999an EH EAJrengandik 200 boto eskasera geratu zela, gogoratu herri mugimenduak azken urteotan EAJrekin izan dituen arazoak...).

Eta hori gutxi balitz, Azpeitiko EAk, Azpeitiko Aralarrek eta Azpeitiko EAE-ANVk ez dute inor engainatu hauteskunde kanpainan. Honatx Uztarriari kanpainan esandakoak:

• Iñaki Errazkin (EAE-ANV): "Gure helburua da aldaketa ematea Udalean. Eta EArekin batera hori egitea aukera posible bat da. Gure aldetik, saiatuko gara adosten akordio bat aldaketa hori aurrera eramateko.".
• Manuel Unanue (EA): "Inola ere ez [dut baztertzen EAE-ANVrekin bat egitea]".
• Juan Karlos Arellano (EB-Aralar): "Prest geundeke EAJ oposiziora bidaltzeko".

Hiru alderdiok, era batera edo bestera, oso argi aldarrikatu dute Azpeitian aldaketaren beharra (aldaketa behar hori gordinegi adierazteagatik galdu ditu botoak, nire ustez, EAk). Pentsa daiteke, beraz, hiru alderdioi botoa eman dioten 3.573 lagunek ez dutela gaizki ikusten Azpeitian aldaketa politikoa egiten saiatzea.

Goian idatzitako guztia hain nabarmena izanik, egoera normal batean ez nukeen idatzi ere egingo, asteburuan herriko zenbait sektoretan sumatu dudan giroa sumatu izan ez banu, herriko EAko arduradunek egunotan jasan duten presioa jasan izan ez balute (presioa EA-ko goi karguetatik, presioa kalean). Ezker Abertzaleari "bide mafiosoak eta faxistak" erabili izana leporatu dioten batzuek darabilzkite orain EA-ren kontrako koakzioa, mehatxua eta ia-ia biolentzia fisikoa ("lapurreta" izan da, "ez da demokratikoa izan", "ikusiko duzue orain, Diputaziotik diru gutxiago etorriko da"...).

Ulertzen dut nik EAJkoak minduta egotea, ulertzen dut 30 urteotan errepideak, etxeak, jaietako programak eta beste hainbat lan egiten dituzten hainbat enpresa-gizon-emakume kezkatuta egotea. Ulertzen dut Udaleko langile batzuen artean egon daitekeen ezinegona ere. Hori guztia ulertzekoa da. Baina Azpeitiko EAJko zenbait ez dira ari ondo bideratzen beren ezinegona; gustatu ala ez gustatu, eta EAJk hauteskundeak irabazi zituen arren, modu zilegi eta demokratikoan galdu duelako alkatetza. Hobeto lukete bere buruari galdetuko baliokete zergatik hartu duten gainontzekoek hartu duten erabakia (bide batez, EA-ko Gipuzkoako arduradunek ere egin beharko liokete beren buruari galdera hori). Zergatik erabaki duten Azpeitian alternatiba bat sortzen saiatzea. EAJ berarentzat izango da onena gogoeta hori egitea, oposiziotik ere egin daitekeelako herria, eta berriro ere alkatetza hortxe izango duelako, herritarrek hala nahi badute.

Bukatzeko: Udalean aldaketa zeinek bultzatu duten ikusita, haien orain arteko diskurtsoa kontuan hartuta, pentsatzekoa da oposizioak (EAJ), gizarte eragileek eta herritarrek udal erabakietan parte hartzeko aukera gehiago izango dutela aurrerantzean, eta hori beti da ona demokraziarentzat, zilegitasun handiagoa ematen diolako Udalaren gestioari.

ERANTZUNAK

1.  Norah - 2007-06-19 | 16:05 Azpeitiko EAJk beti nahi duena egin izan du EArekin, eta oraingoan irizpide propioak dituela erakutsi dute Manuel Urangak eta gainerakoek. Baietz oraindik beti Azpeitiko EAJren gonapean egon diren beste EAkide batzuk atera akordioaren kontra egitera? Irakurri dut nonbait EA-ko militante ezagun batek, beti Bastidarekin oso ondo konpondu den batek ia muturrean jo zuela EAren oraingo zuzendaritzako bat. Hala ere, galdera: Azpeitian zergatik galdu zituen EA-k hainbeste boto hauteskundeetan? Zeini eman zioten botoa EA-ko sektore PNVzale horretakoek? Logikak esaten dit EAJri eman diotela botoa, era horretan Manuel Unanue desgastatzeko. Eta orain EAren izenean hitz egiteko larruazala al daukate? Eutsi gogor Manuel, eutsi gogor Mikel. Animo! 2.  inigo - 2007-06-19 | 16:06 Hirekin ados Iban; zergatik kejau berdik hainbeste PNV-ek pasau dana legezkeu baldinbaek? PNV-ek ez al du ba holakoik behine ein? Ordue bauan herri hontako boterie eskuetatik aldatzeko... 3.  Joxe - 2007-06-19 | 16:55 Ni gehien harritzen nauen gainera orain PNVkoak hain asaldaturik ikustea da, edo EA ko zenbait ere. Aurrez eduki duten jokabidea, azken lau, zortzi, hamabi urtetan. Hauteskunde garaian eta ondoren. Sinistu ezinda nago PNVkoak horrela ikusita orain, baina hau bistakoa zen eta ez duzue ezer egin ekiditeko, aurretik, orain berandu da jaunak. Galtzen ere jakin egin behar da, ez da nahikoa Errazkini kamara haurrean eskua ematea, atzetik lapurra deitzeko edo traidorea beste batzuei. Belarriak jaitsi eta egin oposizioan lan fina, herriari ondo etorriko zaio eta. 4.  txikia - 2007-06-19 | 19:36 Gezurra da PNV esaten ari dena. Botoen arabera ez luke Eizmendik alkate beharko! EA, Aralar-EB eta EAEren artean boto eta zinegotzi gehiago ez al dituzte ba? ezta herria erre balute ere! Ba orduan ixo eta onartu egoera, humil-humil.... Lotsagarria baita aste honetan martxan jarri duten (PNVkoek eta EAkoak ziren batzuk) razzia politiko-soziala. Eta galdera da...zergatik dabil jendea hain urduri? 5.  amek - 2007-06-19 | 20:41 hasteko nik ez dut uzte alkatetza kentzera joan direnik ,aldaketaren alde baizik. besterik ez.irakurketa librea izaten da baina batzuk oso interesatuak gainera.animo ba eta nahiko lan izango duzue 6.  Norah - 2007-06-19 | 21:17 Oraintxe ikusi ditut ETB-2n Jabier Beobide Kanillas eta Aitor Aranguren prentsaurrekoan. Badakizue nola aurkeztu dituen ETB-ko kazetariak bi horiek? "Una amplia mayoría de EA de Azpeitia". Eta bi zinegotzien erabakia "pertsonala" izan dela, aizue. Nahikoa dugu! Nahi-ko-a!!!! Gustura jakin nahiko nuke azken aldian bi horiek Azpeitiko EAren alde zenbat lan egin duten. PNVren morroi izan dira beti Udalean, eta orain ere paper hori betetzen. 7.  Igor - 2007-06-20 | 06:22 Uste dut inork ez duela esan zilegia ez denik, EAJk haseratik garbi ezan du zilegia eta demokratikoa izan dela, berak ez duela iniziatibarik martxan jarriko alkatetza berreskuratzeko, bainan, akordio bat hitzartuta badago eta puskatzen bada esplikazioak eskatzea ez al da zilegi? Herriak aldaketa? berriro idatziko dut, herriaren erdia dago aldaketa nahi horren atzean. EAJk %44a lortu du eta EAn gauzak ez daude oso garbi, ze portzentaia atera dute ANV eta Aralarrek? Eta, presioa kalean?? ze PRESIO? barkatu bainan ANVren jarraitzeileak dira, PRESIOA sartzeko pegatinak ateratzen dituztenak, manifak, koktelak balkoietara, edo korrika batean testigua eskura ematea ukatzen dutenak, PRESIOA? mesedez, neurtu hitzak, zenbaitek goitizenekin eman behar izaten bait dugu hitza, zuk bezala izen abizenekin sinatuz jaso izan dugun presioaren beldurrez. 8.  txikia - 2007-06-20 | 09:10 Hi, Igor: adarra jotzen? Aste honetan kaleko jende "xumeak" EAko zuzendaritzako jendeari PRESIOA egin ziok. Eta latza gainera. Eta hori, ez dakigulako atzean mugitzen ari dena zer den. Eta aldaketa, bai. 17tik 9k aldaketaren alde egin ditek, eta hori nahikoa duk aldaketa emateko. Eta EA-koaz, zer esan nahi duk ba.... hik uste duk Kanillas gaur egun EAn koka genezakeela? Lehen ere, Bastidaren aliatu handiena izan huen, eta denok zekiagu zertarako.... oseake, "no coment" 9.  IbanArregi - 2007-06-20 | 09:22 Igorri (edo goitizen horren atzean dagoenari): presioa ikaragarria izaten ari da, bai. Hori ukaezina da. Beste jende batek ere presioa jasaten duela? Zalantzarik ez dut horretan. Baina oraingo honetan ere presioa dagoela ukaezina da, eta ia-ia biolentzia fisikoa ere egon dela ere bai. Bestetik, nik ez dut esan EAJk zilegia eta demokratikoa ez dela esan duenik. Fijatzen bazara, "Azpeitiko EAJ-ko zenbait" aipatu ditut, eta ez "Azpeitiko EAJ". Hitzak neurtu egin ditut, beraz. Eta bukatzeko: ez dakit nor zaren, ez dakit ze presio sumatzen duzun zure bizian, baina ez pentsa beste batzuek izen-abizenekin sinatzeagatik eta herri-proiektuak aurrera ateratzeagatik presio ikaragarria bizi ez dutenik herri honetan (eta ez naiz ari kaleko jendearen presioaz bakarrik). Ondo izan. 10.  uztarria - 2007-06-20 | 12:17 Kaixo. Uztarriak aurreko iritzi batzuk kendu egin ditu, ez zituztelako web honetako arauak betetzen. Uztarria 11.  Igor - 2007-06-20 | 15:47 Aupa, txikiai/Ibani, presioa galdera ikurretan jartzean, ez nuen ukatu nahi presioa egon denik. Soilik, harridura ematen dit, kasu honetan jendea presioaz hitzegiten aritzea, askosaz presio handiagoa egon denean (eta EAkoak ere jasan dute) jendea isil isilik geratu da. Txikiai:arrazoia duzu, 17 tik 9 nahikoa da aldaketa emateko, horixe esan dut nik ere, gerttatu dena zilegi eta demokratikoa da. Ala ere mugimendu honen atzean egon litekeen "herriaren aldaketa nahi hori" dudatan jartzen dut, adibidez, EAJk, orain dela 8 urte baino emaitza hobeak atera ditu oker ez banago eta botuetan dagoen proportzioa, EAren arabera dago. EAn kontzejalek hartutako erabakia zenbateko apoioarekin hartu duten jakin beharko litzateke (egia da "afiliatu talde zabala" terminoa nahiko abstraktoa eta susmagarria dela). Baino nere ustez arrazoi pertsonalak "aldaketa nahien gainetik egon dira" Ibani: "hitzak neurtu" presioaren asuntoagatik esan nahi nuen. Eta bai, herrian "herri-proiektuak aurrera ateratzeagatik presio ikaragarria" jasaten dutenak badira, nik esaten ditudanak ere "herri-proiektuak aurrera ateratzeagatik" jasaten dute presio ikaragarria. 12.  Norah - 2007-06-20 | 16:40 Igorri: hemen zeinek jasan du presioa "zerbait legitimoa eta zilegia" egiteagatik? Bere garaian EA-k, EAJ-, PP-k PSE-k Habeari tokatutako aulkiak beretzat hartzea legitimoa izan al zen zure ustez? zilegia? "Soilik, harridura ematen dit, kasu honetan jendea presioaz hitzegiten aritzea, askosaz presio handiagoa egon denean (eta EAkoak ere jasan dute) jendea isil isilik geratu da" idatzi duzu. Baina jendea ez da isil isilik egon behin ere. Batzuek gauza batzuk nabarmentzen dituzte batzutan, beste batzuek beste batzuk.... Zuk ere bai, ezta? 13.  IbanArregi - 2007-06-20 | 17:04 Igor-i erantzunez (edo seudonimo horren atzean ezkutatzen zaren horri): ez zait gustatzen zeinekin diskutitzen ari naizen ez jakitea. Beraz, hementxe bukatuko dut (kafe baten bueltan-edo, ni diskutitzen segitzeko prest). Hala ere, bukatzeko, egunotako gai hau dela-eta: ni ez nau gehien kezkatzen EA-ko jende bat jasaten ari den presioak, ezta ia-ia biolentzia fisikora iritsi izanak ere.... Tristea den arren, bizi dugun gatazka giroan, eta aurrera egiten ez dugun bitartean, horrelakoak eta gehiago jasan behar ditu eta jasan beharko ditu jendeak, alde batekoak, bestekoak zein erdibidean dagoenak. Eta kezkagarria da, baina ez da hori gehien kezkatzen nauena. Gehien kezkatzen nauena herrian gai hau dela-eta zenbait jende nahita zabaltzen ari den diskurtsoa da, mehatxu giroan darabilten diskurtsoa: "ez da legitimoa", "ez da demokrazia", "lapurreta da" eta abar eta abar.... Presio dialektikoaz ari nintzen batik bat. Eta nire iritziarekin, diskurtso hori ezbaian jarri nahi izan dut, jende askok, zoritxarrez, irakurtzen duen gutxi hori sinestu egiten duelako, gaiari bi buelta eman gabe. Eta Errazkin Eizmendi bezain alkate legitimoa da. Ez gutxiago, eta ezta gehiago ere. Ez badut argi azaldu, barkatu. Eta esandakoa: hementxe bukatzen dut (eta kafe baten bueltan-edo diskutitzen segitzeko prest). 14.  Aran - 2007-06-20 | 17:11 hori hori! gora kafe! 15.  joxemai - 2007-06-20 | 19:45 IbanArregi, (edo seudonimo horren atzean ezkutatzen zaren horri) zeren ez ahaztu neronek ere firmatu dezakedala Iban Arregi bezela. Ze garrantzi dauka norekin hitzegiten hari zaren jakiteak ? hauek eztabaidak dira, berdin du non dagoen edota nor den beste pertsona. Utzi EAko zinegotziei pakean eta utzi EAEkoei lanean dena kritikatu gabe. joxe mari (edo seudonimo honen atzean ... 16.  Norah - 2007-06-20 | 21:13 Joxemai, txorakeriarik ez ezak esan, eta kontraesan gutxiago. Hauek eztabaidak direla esaten baduk, ez esan gero uzteko pakean EAko zinegotziei eta EAEkoei... Eztabaidak kritikatzeko dituk, ezta? Eta seudonimoekin errazago ibiltzen gaituk denok ere....

Erantzuteko izena eman behar duzu Erabiltzaile-izena Pasahitza »» Pasahitza ahaztu zait »» Lehenengo aldia da eta alta eman nahi dut