Azpeitiko bertsolariak, Zarautzen

KULTURA | uztarria.com |  2003/09/3  16:52

Bertsolari gazteen Lizardi sariko finala ospatuko da ostiral honetan (hilak 5) Zarautzen. Eta ekitaldian bertan, Basarri bertsopaper lehiaketaren sariak banatuko dira. Bi azpeitiar izango dira aurrenekoan: Beñat Lizaso eta Jokin Uranga. Beste batek, saria jasoko du bigarrengoan: Jexux Lopetegik, bigarren saria.

Lizardi sariko finalean eta Basarri bertsopaper lehiaketa sari-ematean.

Iazko kontuak errepikatzen direla dirudi.

Iaz ere hiru azpeitiarren hartu zuten parte Zarautzen irailaren hasieran ospatzen den "bertso festa" historikoan. Beñat Lizaso eta Jokin Uranga izan ziren Lizardiko finalean eta Imanol Lazkanok jaso zuen Basarri sariketako bigarren saria.

Aurten ere berdintsu izango da. Beñat eta Jokin berriro sailkatu dira Lizardiko finalerako, eta iaz Lazkanok egin bezala, aurten Jexux Lopetegik (argazkikoa) lortu du bigarren saria. Gainera, iaz Lazkanori bezala, Ekaitz Goikoetxeak hartu dio aurre aurten ere Lopetegiri.

Lizardi saria

Hogeita bi lagunek hasi zuten Lizardi sariketa, bere aurtengo 27. edizioan. Hauetatik, zortzi egongo dira ostiralean Zarauzko Zinema frontoian: Iñigo Izagirre, Julen Zulaika, Jon Martin, Ekaitz Goikoetxea, Jokin Uranga, Iker Zubeldia, Beñat Lizaso eta Aritz Aranburu

Finalaren ondorengo ekitaldian, Basarri bertsopaper lehiaketaren sariak banatuko dira.

Basarri bertsopaper lehiaketa

Aurtengoa XIX. Basarri Bertsopaper Saria izan da, eta Ekaitz Goikoetxean beasaindarrak jaso du lehen saria, "Nunca máis!!!" bertso sortarekin. Bigarren, Jexux Lopetegiren "Amatxo, baina... non dago aitatxo?" lana gelditu da.

Aurtengoan, Jose Mari Aranalde, Andoni Egaña, Rufino Iraola, Imanol Lasa eta Iñaki Gurrutxagak osatu dute epaimahaia. Azken hau, iazko Lizardi Bertsolari Gazteen Txapelketako irabazlea da.

Ea aurten, halere, iazkoa ez den guztiz errepikatzen: Jokin eta Beñat-ek ez baitzuten saririk etxeratzerik lortu orduan.

ERANTZUNAK

1.  Mikel - 2003-09-04 | 10:36 Biharko finala ze ordutan den esterik bai?, eskerrik asko. 2.  uztarria.com - 2003-09-04 | 11:06 Biharko finala, Zarautzen, Fronton Zineman, 22:00etan da. 3.  azpeitiarrak zenbagarren? - 2003-09-10 | 20:44 Ez det egunkaririk letu azkenaldian, eta esango azpeitiarrak zenbagarren gerau ziren Zarautzen Lizardi sarian? 4.  uztarria.com - 2003-09-11 | 09:08 Lehenengo biren izenak soilik ematen dituzte. Aurrena izan zen Aritz Aranburu, eta bigarrena Iker Zubeldia.

Erantzuteko izena eman behar duzu Erabiltzaile-izena Pasahitza »» Pasahitza ahaztu zait »» Lehenengo aldia da eta alta eman nahi dut